Daily Newspaper

Willian-a club thar Arsenal

12

Chelsea a chhuahsan thu a puan hnu lawkah Brazilian midfielder Willian chuan free transfer-in Arsenal a zawm fel.

Blues chuan an kianga contract hmang zo Willian chu contract thar an zawrh a, mahse, Arsenal lam sawmna nen khaikhinin player hian north London lama kal a thlang ta zawk a ni.

Arsenal hian kumthum chhung atan Willian hi inremna an ziahpui a, kum 32 mi ni tawh mah se an la iai lo hle niin a lang.

Chu thu chu Arsenal boss Mikel Arteta ngeiin nemnghetin, “Kan tana danglamna thlen theitu tur player a nih ka ring nghet bur a, attacking midfielder leh winger position lamah hian kan tha tihchak kan duh a ni.

“Player daihzai tak niin, kan tana rentin daih tur mi a ni a, position hrang thiau pathum pali laiah a khel thei.

“Football khawvelah na na na chuan kawng engkimah tawnhriat a nei tawh a, chuti chungin he hmuna a lo kal hian tum mumal tak a la nei fan a, a club tana engemaw tak pek a duh a, kan indawr laia kan inbiakna leh kan kianga kal a chakzia ka hmuhte khan min hneh takzet a ni,” a ti.

Willian hi kum 2013 khan Chelsea chuan Russian side Anzhi Makhachkala atangin pound maktaduai 30-in an senglut kha a ni a, Blues tan game 339 a khel tling a, west London club chu trophy lian pang^ l^kpuiin, chu’ng zingah chuan Premier League title pahnih leh Europa League title pakhat a tel a, Chelsea player-te’n tumhnih ‘player of the year’ atan an thlangchhuak tawh bawk.
Season liamta khan Willian-a club thar Arsenal hian Premier League table-ah pariatna an hauh pha chauh a, Brazilian-in a kalsan tak Chelsea chuan palina luahin season tharah Champions League an khel pha dawn.

FA Cup final-ah erawh Gunners hian 2-1-in Blues an hneh a; kha game kha Willian chuan hliam avangin a khel ve thei lo a, FA Cup trophy an hlawhchhuah avangin Arteta team hian Europa League an khel thei dawn a, Brazil midfielder pawh Europe-ah a inlan thei dawn tihna a ni.

Willian-a chipui David Luiz pawhin nikum August thla khan Chelsea chhuahsanin Arsenal a lo pan tawh a, Willian hian a team-mate hlui hnung a zui ve ta chiah a ni.

Arsenal technical director Edu chuan an player thar Willian chu a hriatchian thu sawiin, hun rei tak atang tawh khan Brazilian national team lamah an lo thawkdun tawh tih a sawi a, a mihring mihrinna leh football player a nihna zawnah pa duhawm a nih thu a tarlang tel.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy