Daily Newspaper

Wolves in Tottenham an lehpel

19

Thawhtan zan khan English Premier League-ah inkhel pathum a awm a, Wolves chuan an mikhual Crystal Palace an hneh a, parukna an luah let leh. Sheffield United in Everton an hneh loh laiin Brighton leh Newcastle United te an inhnehtawk ve thung.

Wolves in an chak
Tottenham in an lehpel vanga chak mamawh, Europa League-a inlan ngei tum Wolves chuan an mualah Crystal Palace an hneh a, si hnih faia hnehna changin Europa League an hnaih deuh deuh zel.

Molineux stadium-a inkhelah hian team hnihte an inhnehtawk ang reng hle a, goal-a vannei zawk Wolves in hnehna an chang a ni ber. Minute 41-naah Castelo Podence chuan hmahruaina goal a thun a, minute 68-naah Jonny Otto chuan an goal hnihna a thun belh leh. He goal hi september 2018 hnu lamah Molineux Stadiun-a goal a thun leh hmasak ber a ni nghe nghe a ni. Mikhual Palace tan hian Andros Townsend leh Wilfried Zaha te chuan goal an thun teuh hle a, si nghak Rui Patricio chuan tha takin a lo dansak a, a team a chhanhim.

An mualah hnehna pawimawh tak an chan vangin Wolves hian point khatin Tottenham an lehpel a, paruknaah an kir leh. Vawikhat khelh tur an la nei a, khingpui hautak tak an neih a ngai dawn thung. EPL 2019-20 khar zan, Pathianni zan khian Champions League khelh ngei tum Chelsea chu Stamford Bridge-ah an hmachhawn dawn a, an tan chak a harsa hle tura ngaih a ni. Chelsea lakah an tlawm a, Tottenham an lo tlawm ve hlauh bawk a nih chuan Wolves hian Europa League an khel phak dawn a ni.

Wolves elpui lian ber ni ta Tottenham hian khualmualah Crystal Palace an hmachhawn ve dawn thung. Europa League tal khel phak turin an chak ngei ngei a ngai a, London derby-ah inkhel hautak tak an hmachhawn a ngai dawn a ni.

Wolves hian khelh 37 atangin point 59 an hlawhchhuak tawh a, 1979-80 hnu lamah Premier League-ah an chetthat ber hun an tawng. Kum 1979-80 khan point 66 zet an hlawhchhuak a, he record hi an la khum thei rih lo thung.

Sheffield an tlawm
Championship atanga kaisang zinga chetha ber Sheffield United chuan an mualah Everton an mikhual a, chak an mamawh em em laiin si khat faiin an tlawm a, Europa League khelh phak an beiseina a tawp zui nghal.

Chak mamawh tak chunga Everton an hmachhawn tum hian chawlhlawk hmain goal lut a awm lo. Second half an tan chiah a, minute 46-na lekah Richarlison chuan Everton tan tauh goal in hmahruaina goal a thun. He goal hi hun tawp thlengin an sut thei lova, an mualah uiawm takin an tlawm. Everton laka an tlawm vangin Sheffield United hi pariatna aia sangah an awm thei tawh lova, an khelh hnuhnung berah an tlawm a nih chuan top 10 huang luah phak lo thei dinhmun derthawngah an ding thung.

Blades hian an khelh hnuhnung berah Southampton an hmachhawn dawn a, Everton hian tlahniam ngei tura ngaih AFC Bournemouth an mikhual ve thung ang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy