March 3, Thawhleh zan khan English Premier League 2025-26 khelh chhunzawm a ni a, table mawngphaha awm Wolves in champion lai Liverpool an hneh nawlh a, inlehthalna lian a thleng. Liverpool an tlawm lai hian Everton chuan an mualah hnehna an lo chang ve thung.
Wolves an chak nawlh
Table mawngphah luah nghet a tlak hnaih tawh tak Wolves an phur thar a. team lian lakah hnehna an chang zawn. Table-a hmahruai mektu Arsenal nen 2-2 a inhnehtawkin point hlu tak an lo hmu tawh a. Zirrtawp zan khan top 4 huanga awm mek Aston Villa chu 2-0 in an hneh leh bawk. Aston Villa laka hnehna an chan hnuin champion lai Liverpool an mikhual a, fiahna hautak an hmachhawn zui leh nghal zat. Champion lai Liverpoool lakah hnehna lian an chang zui leh a, tlahniam lova him hram an tumnaah phur zawkin hma lam an pan.
Molineux Stadium-ah mualneitu Wolves leh an mikhual Liverpool te an inhnehtawk viau a, goal pawh a lut har hle. Inkhel hmuhnawm takah goal lut a awm theih loh reng hnuin mualneitu Wolves an chefuh hmasa a, goal thun hmasa zawkah an tang. Inkhel hmuhnawm takah goal lut a awm theih loh reng hnuin mual neitu Wolves an che fuh ta nge nge. Wolves hian fuh zetin an khingpuite an nawr let thut a, chiang taka Reds tlarhnung an thiah hnuin Rodrigo Gomes chuan minute 78-naah fuh takin a pet goal a, hmahruaina goal a thun.
Goal thun hmasa zawk an nih vangin mualneitu Wolves phur viau mah se an phur rei lo viau thung. An si phurh sut tuma tan khawh Liverpool in goal an thun nghal teuh hle a, uiawm taka an hun tha hlahin goal post an pet per dawp. An hun tha neih an hlah hnu lawkah Wolves player te ball inpek dik loh vangin hun tha an nei zui leh. Wolves tihsual vanga ball a dawn chu Mohamed Salah chuan fuh zetin a khalh tlang a, minute 83-naah vanneihthlak ang reng taka goal thunin an si phurh a sut.
Goal khat ve ve an thun hnuin inkhel a hmuhnawm zui viau a, hun pangngaiah goal thun belh thei an awm lo. An inhnehtawk tura ngaih a nih hnuin hun pek belh tawp dawn hnaih minute 90’+4-ah mualneitu Wolves an che fuh nawn leh a, Andre chuan vanneihthlak dang reng takin a pet goal a, hma an hruai nawn lehna goal a thun. Andre goal thun vangin Wolves hian champion lai Liverpool lakah hnehna lian an chang a, point thum hlu zet mai an hmu.
Wolves hian team lian Arsenal, Aston Villa leh Liverpool lakah point an hmu zawn a, tlak hniam an hnaih hman hle laiin EPL khel zui zel tlak an nihzia an lantir. Point hlu tak tak hmu zawn bawk mah se vawi 30 an khel tawh a, point 16 chauh an la hmuh vangin a dinhmun a derthawng zui viau tho thung. EPL-a inhamtang zui turin chak zui zel an mamawh a, chak zui zel pawh ni se team dang result-ah an innghah tel a ngai tawh thung, hei hi an dinhmun tichhe zualtu a ni. Wolves lakah an tlawm vangin top 4 huang luah phak tuma tan khawh Liverpool dinhmun a chhiat phah ve viau bawk.
Everton an chak
Thawhleh zana inkhel dangah Everton chuan Goodison Park-a an mikhual Burley chu James Tarkowski leh Kiernan Dewsbury-Hall te goal thun hmangin an hneh a, point thum an hmu. Everton hian pariatna an luah thar a, European competition khelh phak beiseina sang zawk an nei thar.
Everton an chak rual hian Sunderland pawhin Mimualah hnehna an chang a, Leeds United lakah point thum an hlawhchhuak.
Wolves lakah Liverpool an tlawm
