Ethiopia nu phanchang Tigist Assefa chuan tunhnai khan Berlin khawpuiah women’s marathon world record thar siamin, Pathianni race-ah darkar hnih, minute 11 leh second 53 chhungin tlankawng a zawh zo a, nikuma a title lak humhim chungin record thar a puitlin zui ta a ni.
800m specialist ni thin Assefa hian nikum April thla atang mai khan marathon tlan tanin, nikum Berlin race-ah a chak nghal a, kuminah a title kawl lai humhimin, hlawhtlinna ropui a sualchhuak zui a; a hma chiaha women’s marathon world record chu kum 2019-a Kenya tlan chak Brigid Kosgei siam niin, Chicago khuaah kum 29 mi hian dar 2:14.04 hmangin world record a siam a, Ethiopian hian a rawn khum ta a ni.
Assefa record kha Berlin race behchhana world record tum 13 siamchhuahna ni tawhin, nikuma pakhatna a nih tuma a hun hman (2:15.37) kha history-a hmeichhe tlan chak pathumna a ni pha.
Pathianni Berlin Marathon-a mipa chak ber chu double Olympic champion Eliud Kipchoge bawk ni lehin, Berlin race-a chak ngun ber record siamin vawinga a chak tlinna chiah a ni a, darkar 2:02.42 chhungin a tlanchhuak hman.
Kum 38 mi Kenyan hian nikum Berlin-ah khan a vawilina atana Berlin title a lakna kawngah men’s record (2:01.09) dinglai siamtu Ethiopian great Haile Gebrselassie record a lo nihrualpui tawh a, kuminah record malkhalh turin hma a sawn zo lo.
Kum 2019 khan Vienna lamah Kipchoge hian darkar hnih tling loah marathon tlanchhuak hman mah se open competition a nih loh avang leh chhan dang avangin official world record-a puan a ni lo.
Kumin hi Berlin Marathon-a vawiruk a inlanna leh a vawinga chakna niin, a career-ah 2016 leh 2020 Olympics telin Kipchoge hian marathon vawi 19 a tlan tawh a, tum 16 chakin, he tlankawng thui intlansiaka miropui bik a nihna hi phat ngaihna a awm lo!
Women’s marathon world record siamtu Assefa
