BJP Mizoram chuan Nilaini khan Nari Shakti Vandan Adhiniyam thlawpna lantirna atan Two-Wheeler Rally an buatsaih a. Vanapa Hall kawt atanga Sikulpuikawnah kalin BJP State Office-ah hun tawp an hmang.
Rally vailiamnaah Nari Shakti Vandan Adhiniyam state convener, BJP State joint treasurer Lalremsangi Fanai chuan, Prime minister Modi kaihhruaiin Women’s Reservation Bill hman theih tura sawi ho a ni dawn ta chu lawmawm a tih thu a sawi a. Two-wheeler rally-a telte chu BJP an nih vang niloin, Women’s Reservation Bill tha an tih vang a ni, tiin, “Nakin lawkah chuan Mizo hmeichhia MLA tam tak kan la nei dawn a, hmeichhiate hmakhaw ngaitu PM Modi chungah lawmthu kan sawi a. India President bakah Union Finance minister hmeichhia kan nei a, ram hruaitu nihna pawimawh tak tak hmeichhiate pek an ni zel a ni,” a ti.
Rally kharnaah BJP State president Dr K Beichhua, MLA chuan Women’s Reservation Bill pass tawh hman theih tura ruahman lawmna leh hriatpuina kawngzawh an nei chu an lawm tih a sawi a. PM Modi-a’n women empowerment a ngaipawimawh a, hmeichhiate heti taka chawikan a duhna hian India ram pumah a tha zawnga nghawng a neih ngei an ring
tih a sawi. “Mizoramah pawh vawiinah chuan hmeichhia chhungkaw chawm kan tam tawh hle a, sa sat thlengin hmeichhia thahnem tak kan awm tawh,” a ti.
Mizoram hmalam hun thui tak hril thei tur Women’s Reservation Bill hman theih a nih dawn tak avangin, Mizo hmeichhia ram leh hnam tana hma la duhten tun hma aia nasa zawka inbuatsaih a ngai ta tih Dr K Beichhua hian a sawi a. MLA seat tam zawk hmeichhiate tan a nih tawh dawn avangin, Mizo hmeichhiate aiawha ding thei tur khawpa lo inbuatsaih a pawimawh, tiin, kan state-ah pawh hmeichhiaten kan tha kan tih chaka ram rorelnaa tangkai taka thawk thei tura inbuatsaih a ngai tih a sawi a ni.
Women’s Reservation Bill hman tur thlawpin two wheeler rally
