Mizoram sawrkar hnuaia works department ho kalphung zirchiang a, kalphung tha zawk siamtu tur Study Team din a ni a, report pawh thlirho a ni tawh tih chief minister Lalduhoma chuan a sawi.MINECO-a Engineers’ Centre sakna tur lungphum Nilainia a phumnaah chief minister chuan he thu hi a sawi a. Study Team hian tha zawka hmalak dan tur leh insiamthatna tur rawtna an neihte bawhzuia Works lama kalphung tam tak a tha zawnga tih danglam tum a ni tih a sawi.
Mizoram Engineering Service Association (MESA) member-ten Engineers’ Centre sakna tura sum an thawhkhawm chu entawntlak a tih thu a sawi a. Sawrkar engineer-te chu kan ram hmasawnna ruhrel dinna kawng tinrenga a mawhphurtute an ni, tiin, “In kutah hmasawnna hnathawhna tur sum pawh a lut hnem a, inpe zo taka hna in thawh hi kan beisei tlat a ni,” a ti.
Engineer-te hian Zarkawt Babu Tlangah ‘Engineers’ Club’ an nei thin a. An inthlunkhawmna pawl – Mizoram Engineering Service Association chu department hrang hrang awmkhawm an nih avangin chu hmun chu an hna chungchang sawihona atan, conference neihna atan, Aizawl pawn lama posting nei tan headquarters dawra Aizawl an kal changa thlenna atan leh thil tul dang hrang hrang atan an hmang thin. Kum 2011 khan sawrkarin engineer-te building leh ram chu Zarkawt YMA hnenah Stadium cum Recreation & Parking Centre atan a pek tak avangin engineer-te hian hmun leh building an nei ta lo a. Hmunhma pe leh tura vawi tam thuneitute an dil hnuah 2024 June 12 khan sawrkar chuan MINECO-a plot no. B-39 a pe a ni.
Engineers’ Centre sak turah hian mi 500 len theihna conference hall bakah technical discussion room, family transit accommodation, committee room, guest room, canteen leh motor parking a awm dawn a ni. An Centre sakna atan hian Rs. 21,83,000 an thawhkhawm tawh a, thawh zel an tum a ni.
Sak puitlin a nih hun chuan sawrkar department leh sawrkar hnathawk association dang, NGO, kohhran leh mimal thlengin a mamawh tan hman theiha buatsaih tum a ni a. Engineer-te bik chuan seminar leh conference neihna, works department ho karah thawhho dan tur sawikhawmna, technical thila inrawnkhawmna, senior member-ten junior zawkte hnena an hnathawhna kawnga an tawnhriat inhrilhna, technical mite tana tangkai tur lehkhabu daha technical library anga hman atan, codes, manual, technical paper leh journal dahkhawmn, training neihna atan, Aizawl pawn lama awm engineer-ten headquarters an dawr changa thlenna atan leh tul dang atan hman tur a ni.
Works department ho kalphung zirchiangtu tur Team kan din: – Chief minister
