World Bank Preasident David Malpass chu June 1 ah a chawl tawh dawn a, kum li zet thuneitu dinhmun sang ber a chelh hman a ni. Malpass hi khatih laia US President Donald Trump-a ruat a ni a.
“Ngun taka ka ngaihtuah hnuah chona thar hmachhawn ka thlang a ni,” tiin kum 66-a upa Malpass chuan a sawi a, a thutlukna siam chu board hnenah a hriattir tawh thu a sawi bawk.
“Bank Group tena khawvel harsatna a hmachhawn mek zelah tun hi hruaitu inthlaka chetlak hun niin ka hria” tiin Malpass chuan a sawi bawk a.
Kum li lai World Bank a enkawl chhungin khawvelin harsatna namen lo Covid pandemic te bakah Russia in Ukraine a run te bakah international economic slowdown te a tawng a ni.
Bank chuan khawvelin harsatna a tawhin rang taka chet an la zui nghal thin thu sawiin pandemic leng bikah pawh $ 440 billion lai an thehchhuah hman thu an sawi bawk a.
“A kaihhruaina hnuaiah Bank Group te chuan developing ram te hnena climate finance pek chu a letin a tipung a, nikum khan $ 32 billion a kai a ni,” tiin World Bank thuchhuah chuan a tarlang.
Malpass chuan, “Developing ram ten harsatna namen lo an tawk vek a, chung harsatna chingfel tur chuan Bank Group te chuan rang tak, chak tak, liantham tak leh awmze neia nghawng nei turin chet kan la nghal thin,” tiin a sawi.
World Bank President a nih hma hian Malpass hi US Treasury a thawk tawh a ni bawk.
World Bank President chawl dawn
![](https://theaizawlpost.org/wp-content/uploads/tap_logo-min-large.jpg)