World champion nih hnua Messi goal hmasaber

World champion nih hnua Messi goal hmasaber
Ningani zan international friendly match pakhata Argentina-in sihnih faia Panama an hnehna inkhelah Lionel Messi chuan mualneitu team goal hnihna khungin, nikum December thlaa world champion an nih hnua international match a khelh leh vawikhatnaah Argentina captain-in goal a khung leh nghal.
Argentina leh South America khawmualpui huapa khelmual lian ber Buenos Aires khawpuia Monumental Stadium kha mipui 83,196 len theihna niin, Ningani zanah mipui 80,000 chuangin world champion an nih hnua an ram inkhel hmasaber a hmunah an thlir a, Messi bawk a langsar leh ber.
Lionel Scaloni chuan nikum Qatar ram World Cup final-a France an hneh tuma a starting line-up chiah kha Panama lakah chhawr lehin, mualneitu team-in tan phat atangin inkhel thunun nghet hmiah mah se goal an tilut thei mai lo a, Panamanian defensive wall khawng char bur kha second half laihawl pelhah an thiat thei chauh!
Minute 79-ah Messi free-kick pet chuan goal ban veilam fuhin, ball perlet chu Atlanta United player Thiago Almada chuan goal-ah chantirin, ram tana a goal khatna a hmin.
Minute 89-ah captain Messi hun a herchhuak ve ta nge nge a, a free-kick chhuih pui tak hmangin a career-a a goal 800-na puitlinin, Monumental Stadium chhunga fans 80,000 chuang a lamtir.
Inkhelh banah Argentine FA lamin chak lawmna leh kum 36 an nghah hnuah World Cup title pathumna an sualchhuah lawmna hun an buatsaih leh a, tah chuan PSG star Messi tan thusawina hun siamsak niin, World Cup trophy hawn kha a mangphan thin a nih thu leh a chipuite nena trophy hlu bik lawmho tluka thlakhlelh a neih loh thu a sawichhuak leh.
Messi chuan, “Tuna kan kal dan hian kal chhunzawm zel ila, hun rei tak kan nghah hnua hlawhtling thei chauh kan nih avangin nikuma kan trophy hawn pawh kha i lawm zel ang u,” a ti.
Mittui nena dingchhuak Scaloni pawhin a player-te fakna thu sawi chungin, “Football neitu an ni a, anni tel lo hi chuan World Cup hnehna kha chan mi rual a ni lo. He shirt hatu zawng zawngte hian an theihna sang ber an hlan theuh a, a chang chuan kan duhthusam result kan hmu lo pawh a ni thei a, mahse, kan hlawhtlin ni a herchhuak a, a awihawm loh hial zawk a ni,” a ti.
Ni 95 kalta Lusail Stadium-a an tih ang bawkin Argentina player-te chuan an head coach hi van boruakah an vawr kang a, Frane an hneh ni ang maiin Argentinians an phur!
Argentina hian world champion nih lawmna (World Cup winners’ homecoming) an la kalpui chhunzawm zel a, karleh Thawhlehni pawh hian chumi chhunzawmna atan Curacao nen friendly match an khel leh dawn a; hemi ni vek hian Panama chuan CONCACAF Nations League lamah Costa Rica an tum thung ang.