Khawvela ennawm ropui ber FIFA World Cup vawi 23-na chu Thawhtanni zing khan New York khawuia MetLife Stadium-ah khelh zawh a ni ta a, phu takin Spain an champion. Kan thlah liam tak World Cup 2026 a thil thleng langsar zual kan thlir kual ang.
Goal : World Cup 2026-ah hian a vawi khat nan ram 48 te an inel a, ram 48 te hi group 12-ah pali zela then darh niin group stage-ah vawi thum theuh an khel phawt a. Group stage atanga tlang ram 32 in last 32 an khel a. Last 16, quarter-final, semi-final, third place play-off leh final khelh a ni a, final thleng hian match 104 a awm.
Match 104 atangin goal 308 zet a lut a, inkhel tinah goal 2.96 lut zel ang a ni. World Cup 2026 ah hian player langsarte an chetha a, goal pawh a lut hnem. Golden Boot dawngtu Kylian Mbappe chuan goal 10 lai a thun. World Cup-ah a chetthat theih em vanga ‘Mr. World Cup’ an tih mai Mbappe hi World Cup-ah a zawna Golden Boot dawng thei awmchhun a ni nghe nghe. Golden Boot a dawn bakah Mbappe hian World Cup-ah match 22 khelin goal 22 lai a thun a, World Cup awm tawh zawng zawnga goal thun hnem ber a ni tel bawk.
Player ngaihven hlawh Lionel Messi chuan goal 8 thunin Silver Boot a dawng. Messi hian World Cup ah goal 21 thun tlingin goal thun hnem ber dawttu a ni a, goal khatin Mbappe a phak lo.
Kan thlahliam tak World Cup 2026-ah hian player pali; Lionel Messi, Jonathan David, Ousmane Dembele leh Bukayo Saka ten hattrick an siam.
World Cup 2026-ah hian mahni lama tih (Own goal) 13 zet a awm a, World Cup 1966 hnu lama Own-goal tam leh ber tum a ni.
|hiante goal thun tur siamsak kawngah France midfielder Michael Olise a thawhhlawk viau a, assist vawi 7 zet a nei. Olise hi World Cup 2026-ah assist ngah ber a ni a, World Cup vawi khata assist ngah ber a ni tel bawk.
Red Card
World Cup 2026-ah hian player 16 in Red-Card an hmu a, World Cup hnuhnung pahnih; 2018 leh 2022 a Red Card hmu zawng zawng aiin tun World Cup a red card hmu hi an tam zawk. World Cup tum khata Red Card phawrh tamna ber chu Germany in a thlen World Cup 2006 ah khan a ni thung a, mi 28 zetin red card an hmu.
Inkhel entu: World Cup 2026 ah hian ram 16 ngawt an tel belh ta bawk a, A hmuna inkhel entu pawh an pung hluai. Final khelh zawh a nih thleng khan a hmunah mi maktaduai 6.8 in an en a. Inkhel tinah a hmuna entu mi 65,490 awm ziah ang a ni. Final a Spain leh Argentina inkhel khan entu a ngah bera mi 80,663 zetin an en.
Lawmman:
World Cup 2026-a champion Spain in Trophy hlu tak bakah tangkafai US Dollar maktaduai 50 an dawng a. Pahnihna Argentina in US Dollar maktaduai 33, pathumna Englandin US Dollar maktaduai 29, palina France in US Dollar maktaduai 27 an dawn bakah World Cup-a group stage paltlang zo lote pawhin US Dollar maktaduai 10 an dawng vek bawk.
Mimal chawimawina
Champion thar Spain mimal chawimawina ngaihhlut hlawh pathum; Golden Ball, Golden Glove leh Young Player Award te an hui vek.
Spain champion nana thawhhlawk tak Rodri chu player tha berah thlan niin ‘Golden Ball’ a dawng. Tunlaia midfielder tha ber Rodri hi a thiam em vangin ‘Midfield General’ tih hial a ni a. Kum 2024 khan mimal chawimawina ngaihlut hlawh ber Ballon d’Or a lo dawng tawh bawk.
Champion thar Spain hian an khingpuite lama goal 14 zet an thun laiin goal 1 chauh an chhuah. Clean sheet vawi 7 zet nei thei Unai Simon chuan phu takin Golden Glove a dawng. Simon hian World Cup tum khata clean sheet ngah ber record thar a siam bawk.
Barcelona rawlthar defender thiam em em mai, kum 19 mi lek Pau Cubarsi chuan a phu ang ngeiin Young Player Award a dawng. Cubarsi hian Spain tan a khel kim vek a, an tlarhnung a veng tha hle.
Record langsar
France captain Kylian Mbappe chuan World Cup hrang pathum khelin goal 22 a thun tling a. World Cup chanchina goal thun hnem ber ni thin Miroslav Klose record siam goal 16 chu goal 6 ngawtin a khum a, World Cup chanchina goal thun hnem ber record thar a siam.
Kum 39 mi Lionel Messi chuan Algeria an hmachhawn tumin hattrick a siam a, World Cup-ah hattrick siam thei upa ber record thar siamin a elpui lian Cristiano Ronaldo record a khum.
Kum 41 mi Portugal captain Cristiano Ronaldo hian last 32-a an khingpui Croatia lakah goal a thun a, World Cup-ah knock-out stage-a goal thun thei upa ber a ni. Ronaldo hian World Cup paruk (2006, 2010, 2014, 2018, 2022 leh 2026) ah goal a thun vek a, World Cup hrang paruka goal thun vek thei awmchhun a ni.
Player ropui pahnih; Lionel Messi leh Cristiano Ronaldo ten World Cup paruka inlan vek thei record duhawm an siam dun bawk.
World Cup 2026-ah hian a vawi khat nan mihring 150,000 vel lek awmna Curaçao an tel a. Anni hi World Cup a tel phak zinga mihring tlem berna ram an ni.
Champion thar Spain kha international match ah tlawm nei lovin khelh 38 chhung an kaltluang ta chiah a. Italy record match 37 khumin international match-ah tlawm nei lova kaltluang rei ber record thar an siam. World Cup-ah an champion a, international match ah tlawm nei lova kal tluang rei record thar an siam tel bawk a. An chawm bawka an hawp bawk a ni ber mai.
World Cup 2030
World Cup 2026 a zova, World Cup dawt leh hi kum 2030-ah khelh leh tur a ni. World Cup 2030 hi Spain, Portugal leh Morocco ten an inthlen tawm dawn a. World Cup kum 100 na ‘World Cup centenary’ a nih dawn vangin match hmasa pathumte chu Uruguay, Argentina leh Paraguay ahte khelh a ni dawn thung. Heng ram pathumte hi inelna thlengtu an nih ve tho vangin World Cup khel tura tling sa an ni a, World Cup 2030 khel turin ram paruk; Spain, Portugal, Morocco, Argentina, Uruguay leh Paraguay te an tling sa tihna a ni.
World Cup 2026 a hnuhma langsar zual
