World Cup final halftime show hmasaberah Coldplay inlan dawn
NFL final, Super Bowl halftime show chu entertainment khawvelin a nghahfak a ni thin a, tunah chuan FIFA pawhin World Cup final-ah halftime show a buatsaih ve dawn ta a, 2026 World Cup final halftime show-ah British group Coldplay an perform dawn e.
2026 FIFA World Cup final hi July ni 19, 2026-ah, MetLife Stadium, New Jersey-ah khelh a ni dawn a, Super Bowl-style halftime show Wrld Cup-a neih tur hi a vawi khatna tur a ni a, Coldplay vocalist Chris Martin chuan FIFA nen show hmuhnawm tak chhawp chhuak turin an inbuatsaih niin a sawi.
FIFA president Gianni Infantino pawhin FIFA World Cup final weekend-ah hian Times Square-ah ropui taka eng emaw tak tih an tum niin a sawi a, 2026 FIFA World Cup hi US, Mexico leh Canada ten an thlengho a, final hi US-ah khelh a ni ang.
Infantino chuan Dallas-a FIFA conference zawh hnuah FIFA World Cup final-a halftime show an neih tur thu hi Instagram-ah puangin, “New York New Jersey a FIFA World Cup final-ah Global Citizen nen thawkhoin halftime show a vawi khat nan a awm tih ka nemnghet e. FIFA World Cup tan hun chhinchhiah tlak a ni dawn a, khawvela sporting event ropui ber nen pawh a inhmeh khawp ang,” a ti.
Infantino hian Coldplay perform tur thu hi a puang tel lonain, Martin leh Coldplay manager Phil Harvey te chu artist dang rin luhna turah hmalatu zingah an tel dawn tih a sawi a, “Chris Martin leh Phil Harvey te chungah lawmthu ka sawi a, anni hi FIFA nen thawkhoin, halftime show leh Times Square a perform tur artist thlangtu an ni ang,” a ti bawk.
World Cup final halftime show hmasaberah Coldplay inlan dawn
