Khawvela game ropui ber football puala tournament World Cup, a vawi 23-na kumin 2026 June ni 12-a khelh tan chu Ni 20-7-2026 zing khawvar lam dar 3:30 khan final match khela zial fel niin, Spain chuan si khat faia champion lai Argentina hnehin World Cup championship trophy dawmin, the greatest show on earth chu ropui takin kan thlahliam leh ta ruai ruai mai.
Closing ceremony kan thlirliam takah khan khawvela celebrity lar em em Tom Cruise-a’n World Cup chungchang leh football chungchang thu sawiin, “Football hi tawng chi tin huap pawimawh tak mai, sawirik (spoken) loha a hmana kan hman theih thil hlu tak a ni,” tiin a sawi.
Tin, zaithiam Shakira, Madonna, BTS etc. ten World Cup liam tur chu ui tak chungin mawi takin zaiin an awi hlawm bawk a, a ngaihhtlak a nuam hle.
Final match-ah kha a bul atangin Spain hoin ball 100% deuh thaw an chang (possess) a; Argentina ve thung khan ball an chang tlem hle a, an che thei mang lo a ni ber mai!
Regulation time 90 mins chhungin vawikhat mah South American team khan goal shot mumal an nei thei lo a; chu mai bakah a chuh lama an hneh lo nak-a-laiin goal scoring machine taka an neih Enzo Fernandez khan red card a han hmu zui leh nghal!
Argentina fans hlauhthawnna belhchhah turin Spain ho lah khan counter attack an rawn ti nawn awn awn mai si, vawi tam tak Argentina keeper Martinez khan goal a save a, goal an ba hnem lo hram zawk a ni.
Comment:
Argentina defender pawimawh tak Lisandro Martinez leh Christian Romero-te inhliam kha a pawi khawp mai. Anni pahnih lakchhuah (substituted) an nih atang khan an chan a chau deuh deuh a, Spain hoin an rawn attack zual sauh si.
Tin, yellow card mi panga zetin an hmuh lai khan anni ho kha an coach Scaloni khan la chhuak zung zung se, an danger lo sawt tur hi nia.
Midfield leh attacker-te an coach hian a dahtha rei lutuk a, an chhiatpui hle a nih kha. A chhan chu yellow card hmu hnu tlema kan chet sual chuan yellow card dang hmu chunga red card a nih zui tawh mai vang a ni, entirna’n, Enzo Fernandez angte kha.
Kumin WC-ah hian VAR an hman uar tehlul nen final ni tak maia referee berin VAR a rawn duh der lo kha a mak angreng khawp mai!
Referee-in foul emaw handball emaw a kiang hnaiha mi a hmuh mai vanga chiang tawka ngaih tlat tur pawh a ni lo a, VAR hi angle tina slow motion-a fiah/chiang tawk taka lak a nih avangin referee mita a hmuh aiin a chiang zawk tih hi hriat tur a ni.
Argentina coach khan Lautaro Martinez teho a thuhruk tlatte kha rawn tir lutin Spain ho kha rawn attack ve mawlh mawlh se lang chuan an hneh zawk mai thei hi a nia, hun tawp dawn tepa an va tih ang khan attack hmasa se.
Tin, an keeper Emi Martinez kha dau nei a, sure goal pawh a save hnem vei nen, kha mi kha hmantangkai nachang hria se la chuan, a chuh lama an hneh si loh kha chuan goal super defence nasa takin ti se, penalty shootout-ah luh pui mai se, an keeper-in a chhanhim tur hi a ni a!
Argentina coach Scaloni-a’n a study phak miah loh chu Spain ho hi WC history-a penalty shootout-a vanduai thang an ni tih hi a ni.
Best player-ah khan Rodrigo (Spain) ai chuan Messi khan a phu zawk mah mah a, chhan chu Argentina captain hi playmaker a nih mai bakah assist a ngah hle zawk a ni lo maw tih chu mipui ngaihdan a ni.
Champion team Spain ho hi WC leh Euro history-ah hian record an nei tha hle a, kum 1964 khan Euro an la (win) a; tin, 2008 khan an la leh a; kum 2010-ah World Cup an la zui a; kum 2012-ah Euro an la leh bawk. Chutiang deuh chuan tun tum pawh hian kum 2024 ah Euro an la a, 2026 ah WC an rawn la leh a, kum 2028-ah pawh Euro an rawn lak leh hmel khawp mai!
Runners up Argentina ho hi Copa America-ah vawi 16 zet an lo champion tawh a; tin, WC-ah hian vawi sarih final an khel tawh a, chu tah chuan vawi thum (1978, 1986, 2022) an champion a, vawi li ngawt (1930, 1980, 2014, 2026) runners up an ni tawh bawk.
Wolrd Cup history-ah hian thil thleng (chanchin) mak ve angreng tak thleng thin a awm a, chu chu kan han sawifiah ang e:
WC tournament hi Europe continent chhunga nghah a nih changin Europe ram (country) team-te an champion thin a; continent dang (North America, South America & Asia)-a WC nghah a nih tumin he’ng South American ram/team – Uruguay, Brazil leh Argentina-te hi an champion thin bawk.
He thil hi WC calendar kan raw tarlanah hian enfiah theih a ni ang.
Amaherawhchu, he thil hi a inthlakdanglam chang a awm ve tho mai. Eg. Sweden (Europe) ramah kum 1958 khan South American ram Brazil chuan WC trophy an han chawi a; Spain hoin Africa ramah kum 2010 khan an la bawk a; kum 2026 hian North America khawmualpuiah Spain bawk an champion leh a; Germany-in kum 2014 khan South America khawmualpui ram ram Brazil-ah WC an zu la bawk.
Tin, kum 2022 khan Asia lamah Qatar khan Fifa tournament lian hi an dawl a, tah khan Argentina (SA)-in trophy an chawi a; chhui danah chuan tun tum 2026 WC pawh hi Europe continent pawn lam (North America) lamin an thlen avangin South American country zinga football powerhouse Argentina hian WC hi an lak leh kan beisei laiin European country Spain-in an rawn la leh lawi bawk si, a mak ang reng!
A nih leh 2030 WC hi Europe continent chhung Portugal leh Spain bakah Africa khawmualpui ram Morocco-te’n an inthlentawmho dawn a, chu tah chuan tu ram nge rawn champion ve thung tawh ang tih chu chhui a har angreng hle tawh ang!
WC awm tawh zawngah hian he’ng Europe ram – Germany, Italy, France, England leh Spain-te hian WC hi vawi 13 zet an lo la tawh a; South America ram zingah Brazil, Argentina leh Uruguay-te hi belhkhawmin vawi 10 an champion ve tawh bawk. Step thumin Europe lam hian hma an hruai tihna a nih chu. South America ramte’n tan an lak nasat a ngai ta.
World Cup 2026, mangtha vawng vawng le, kum 2030 khian Portugal, Spain leh Morocco ramah dam takin kan inhmu leh dawn nia…
World Cup kan thlahliam ta…- Jipson S. Hrangate (AFC Referee)
