Daily Newspaper

World Cup khel tura tling hmasaber Germany

92

Thawhtanni zana sili faia North Macedonia sawp chungin Germany chuan nakum Qatar ram World Cup khel turin an dinhmun an sawhnghet a, European team zinga 2022 World Cup khel tura tling hmasaber an ni.

Kai Havertz chuan second half tir lamah mikhual hmahruaina goal khungin, mahni hmasial lo Thomas Muller-a siamsak a ni.

Second half laihawl minute thum chhungin Timo Werner chuan goal hnih a khung thawt a, a hmasa zawk minute 70-a a goal hi Muller-a thawhrah leh bawk niin, Germany goal thumna hi minute sarih la awma substitute Jamal Musiala tihluh a ni a, ram tana game kua a khelh tlin zanah England youth international hlui hian a tumkhatna’n international goal a hlawhchhuak ve ta nge nge a ni.

German-ho khan goal tam zawk thun thei tur an nih laiin Chelsea forward Werner chuan half time dawnah goal ban a petper a; rawlthar kum 18 mi Musiala tan zan ropui a ni ta thung.

Ex-Chelsea academy graduate hian Germany senior team zawm a thlan hmain England youth team hrang hrang tan match 19 a khel hman a, a nu thisen atanga a zawm theih Germany tana khelh a thlan hnuah game kua a khelh tlin rualin a senior goal hmasaber a hlawhchhuak ta a ni.

World champion vawili ngawt ni tawh Hansi Flick-a naute khan qualifiers khelh riat atanga point 21 thawkchhuak tlingin, Group J lama anmahni hnaihbertu Romania lakah point riatin hma an hruaifal ta a, a tum 20-na’na World Cup khel turin an tling a, an aia he tournament khel ngun awmchhun chu Brazil (21) chiah an ni tawh.

European qualifiers group 10 zinga group tina point hmu sang ber theuh hian automatic-in Qatar ram tournament an khel thei dawn a; German-ho hian an group-ah khelh hmabak vawihnih la nei chungin Arab rama Fifa World Cup hmasaber khel turin an dinhmun an sawhnghet a, thla thar hian tling tawhsa chungin Liechtenstein leh Armenia an hmachhawn leh ang.

Germany hi champion lai ni chungin 2018 World Cup-ah khan first round paltlang zo loin an mualpho a; kumin Euro lamah lah last 16 an thleng pha awrh chauh a, mahse, player malkhaia lar vut leh superstar ngawih ngawih han tih tur kawl lo chunga eng lai maha team chhia ni ngai lo an nihna an pholang leh a, European team zinga 2022 World Cup khel tura tling hmasaber an ni leh thei ta tho a ni.

Coach thar hnuaia insiamtha chho mek Germany hi Flick-a hoa game nga an khelh tawhah an la chak fai vek a, a team a tlinpui hnuah kumin kumtir lama Joachim Loew thlaktu Flick chuan North Macedonia rama an result hlawhchhuah chu duhthusam a nih thu leh a rang thei ang bera qualify thuai thuai an duhna an tipuitling tih a sawi a, a zawna vawinga hnehna chan chu ropui a tih thu leh a naute rilru sukthlek dik chho ta lutukin a tihlawm thu hahipin a sawi a, a oa an kal tawh chinah a lungawi tih a tarlang tel.

Karliamta Zirtawpni zan mai khan German-ho hian 2-1-in mikhual Romania an lo hneh tawh a; kumin March thlaa 1-2-a an ngam loh North Macedonia lakah tuntum chu an chesual nawn duh ta lo a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy