World Cup khelh tum Neymar-a contract thar

Ram tana game 142 khel tling Cafu tih loha Brazil tana match khel hnem ber ni mek Brazil forward Neymar (128) chuan kumin world cup-a hmun a chan leh beiseina avangin Santos-a a contract tawp mai tawh tur chu kumin kum tawp thleng daih turin a pawtsei.
Kum 33 mi hian Arab ram a chhuahsan hnuah January 2025 khan a naupan lai club zawmin, hliamin a tihbuai chhoh deuh reng avangin kum 2023 atang khan world champion vawi nga ni thei awmchhun Brazil tan a la khel leh ta lo vang vang a ni.
Barcelona leh Paris St-Germain forward hlui hi season liamta pawh khan hliamin a la tibuai zui ta zel a, mahse, dam chiang ver vawr lo chungin a club tan a khel zui ve tang tang a, an match khelh hnuhnung vawi ngaah goal nga thunin Brazil top flight atanga Santos tlahniam tur a chhan thei hram a ni.
Kha mi hnu khan a khup veilam chu zai a ni leh a, hei pawh hi kumin nipui thawt lai Fifa tournament khel tura Brazil coach Carlo Ancelotti squad-a tel a beisei vang a ni.
A kum leh hliam dam hlei thei lo neih dan enin chawl ve tawh mai tur awm tak ni mah se kumin hian a tawpna’na world cup han khelh leh hram a duhna avangin Santos-a a contract neih lai pawh a pawtsei leh ta a; an club social media-a post a siamah Brazilian chuan, “Santos hi ka hmun a ni a, ka in dik takah ka khawsa mek a ni,” a ti.
Fans lam hawi zui chungin: “Kan la hlawhtlin mai theih lohna kan beisei hlawhtlinna tur hi nangniho nena hlawhchhuah ka duh a ni,” tiin.
Nikum October thla khan Ancelotti chuan goal 79 ngah tawh chunga Brazil ram tana goal khung hnem ber ni mek Neymar chungchang sawiin, national team-a kohkir hlawh leh tur chuan a dam fel thlap (fully fit) a ngaih thu a sawi.
October 2023 khan khup hliam buaithlak chi anterior cruciate ligament (ACL) an tih avangin thla 12 zet a chawl a; nikum khan thla 17 zet a kalbo hnua national team-a kohkirleh a nih hnuah tihrawl hliamin a tlakbuak leh ta tlat a, squad atangin a inhnukdawk leh a, tun thlengin ram tan a la inlan thei ta lo tluang zel a ni.
Kumin June thla atanga Canada, Mexico leh United States-te inthlentawm tur World Cup-ah hian Group C lamah Brazil hi Scotland, Morocco leh Haiti-te nen an awmho.