World Mental Health Day hmang Ngaidam thei lo mi an dam thei lo

World Mental Health Day 2024 chu Ningani khan khawvel hmun dang rualin Mizoramah pawh hman a ni a. Aizawla hmannaah chief minister Lalduhoma chuan midangte ngaidam thei lo mihring chu an dam thei loa, ngaihdam hi damna a ni tih a sawi.
Volunteers for Community Mental Health (VOLCOMH) bultumin Ningani khan Aizawlah World Mental Health Day hi hman a ni a. Kan ngaihtuahna kal dan ang zela lungchhiaa mittui tla mai thei leh hlim taka nui thei kan ni tih chief minister hian a sawi a. Rilru a hrisel loh chuan taksa a hrisel thei loa, kan damkhua sei thu chu taksaah chauh ni loin kan rilru lamah a innghat tel tih a sawi.
“Midangte ngaidam thei lo mihring hi an dam thei loa, ngaihdam hi damna a ni. Nitin hian duhthlan theih pahnih kan nei, hlim nge lungngaih tih hi,” a ti.
Mihring suangtuahna, min tihlautu tam tak chu a taka thleng a tlem hle tih Lalduhoma hian a sawi a. Kan rilru lama hrisel lohna kan tawh tam tak chu chutiang suangtuahna vanga lo awm chu a ni tih a sawi.
“Kan thil thlir dan (attitude) hi a hrisel tur a ni a, kan nuna thil lo thleng tam tak hi kan tihdanglam theih loh, kan va inrawlh ve theih loh tam. Nimahse, chu’ng thil kan lo dawnsawn dan zawk chuan kan chunga a nghawng dan kha a siam mai zawk a ni. Kan beisei ang thil a lo thleng ta lo a nih pawhin Pathianin duh dan dang a nei a ni tih lo pawm ve leh mai tur a ni,” a ti.
Health & Family Welfare minister Lalrinpuii pawhin rilru hrisel nei tura thinlung lam ven that a tul hle a. A bikin hnathawhna hmun chu kan hun tam ber hmanna a nih avangin a boruak kan tihnawm thiam a tul hle tih a sawi. “Midangte tanpuitu nih duhna rilru pu chunga kan awm hian boruak nuam zawk a lo chhuak mai thin,” a ti.
Kumina World Mental Health Day thupui chu “It is time to prioritized Mental Health in the Workplace” tih a ni.
VOLCOMH hi kum 1992 khan rilru hriselna zirtirna leh rilru lama natna laka mite venhim hna thawk tura mi tlawmngaite din a ni a. Din a nih atang hian kumtin Mental Health Day hi an hmang thin. Kum 2017 atang khan ‘Teen Mental Health Initiatives’ an kalpui a. An thawhpui tur zirlai intelkhawm Green Ribbon Club hi higher secondary school 5-ah leh Pachhunga University College ah an din tawh.