September 25 kha World Pharmacist Day a ni a. He ni pual hian Aizawlah pawh Mizoram State Pharmacy Council huaihawtin hman a ni.
Hmanpuitu Health minister Lalrinpuii chuan, District Hospital tinah tal damdawi lama thiamna bik nei pharmacist an awm a pawimawh tih a sawi a. Hei bakah hian Mizorama ruihhlo leh HIV hluar zelah pawh pharmacist-te chu thiamna bik nei an nih avangin tangkai lehzuala khawtlang, sawrkar leh midang tana an thiamna hmang turin a chah.
MSPC president Lalsawma chuan pharmacist-te leh zirlaite chu midang tan tangkai zawk leh dan ang taka damdawi mipuiin an hmuh theihna’n theihtawp chhuah turin a chah a. Dr. Lalnunpuii chuan kumin World Pharmacist Day thupui “Pharmacists: Meeting Global Health Needs” (Khawvel mipui hriselna atana pharmacist-te pawimawhna) a sawizau a ni.
World Pharmacists Day hi kum 1992 atang khan International Federation of Pharmacists huaihawtin kumtin hman a ni a. Aizawla hun hmanah hian RIPANS Department of Pharmacy, Laithangpuii College of Pharmacy, Mizoram Institute of Pharmaceutical Science leh Mizoram Pharmacy Council hotute, member-te bakah sawmbik an tel a ni.
World Pharmacist Day hmang
