August 19 kha World Photography Day a ni a, kumin hi a vawi 185-na a ni. Aizawlah pawh Information & Public Relation Department, Mizoram Photographers’ Society (MPS) leh Photography Club of Mizoram (PCOM) tangho buatsaihin hman a ni.
World Photography Day pual hian thlalak inelna buatsaih a ni a. Thlalak lama tui mi 97-in an thlalak 468 an thehlut a. Heta a tha zual 100 hi exhibition gallery-a phochhuah an ni. Thalak hi category pathum – One Earth, Colour leh Monochrome-ah thenin, category tinah pakhatna atanga pathum thleng lawmman pek an ni a; mi panga theuh hnenah consolation prize pek a ni. Lawmman dawngtu te hnenah hian trophy, certificate leh sumfai pek a ni.
Day hmanpuitu Art &Culture minister C Lalsawivunga chuan, mitinin smart phone kan hum fur tawhna leh thla lak kan uar em em na khawvelah kan cheng tawh a. Mahni leh midang tana mualpho theihna tur pawh then hrang thiam tawh loin thla ka la-in kan thehdarh nasa mah mah niin a hriat, tia sawiin, “Chutiang khawvela kan chen mek lai hian a tha zawnga kan hnam ziarang leh incheina, kan ram mawina leh khawtlang nun khawvel zau zawka phochhuahna kawngah sulsutu leh kawng kawhhmutu nih tum ang che u,” a ti.
Vietnam indonaa khawvel dengchhuak hmeichhe naupang thlak ‘Napalm Girl’ aurin zia leh thil tih theih zia kha photographer-te chuan an hriat vek a nih angin, thu tam taka sawi aiin thlalak hmangin Mizoram mawi zia leh nawm zia, kan khawtlang nun mawi tak chu khawvel zau zawkah an puangdarh thei, tiin a fuih bawk.
I&PR deparment-a photography nodal officer, deputy director Pratap Chhetri pawhin photographer-te chu chhiat ni that ni thlalak piahlamah photo journalism lama inhmanga, an talent-te Mizoram tan hmang tangkai turin a sawm a. Chawhnu lamah thlalamite tan workshop buatsaih niin, Malsawmtluanga Vangchhia leh Laldintluangi Tochhawng ten an zirtir a ni.
World Photography Day hmang
