Saudi Pro League club top-flight team zinga game 28 chhung chak zawn hmasaber ni turin Thawhlehni khan Asian Champions League-ah sihnih faiin Arab team ve bawk Al-Ittihad an hneh a, kum 2016 daih tawha vawi 27 chak zawn Welsh club The New Saints record an lehpel ta a ni.
Saudi Arabia rama team hlawhtling ber Al-Hilal hi nikum September ni 21-a Damac nen sikhat ve ve thuna an inhnehtawk hnu khan an khelh apiangin an la chak fai vek a; he team-ah hian nikum nipui laia Paris St-Germain atanga euro maktaduai 90 (£77.6m) zet senga an lakluh Brazil forward Neymar bakah Fulham forward hlui Aleksandar Mitrovic leh Wolves midfielder hlui Ruben Neves an tel.
Neymar erawh nikum October thlaa a khup hliam avang khan khelmualah hmuh tur a la awm rih lo.
Cristiano Ronaldo khelhna Al-Nassr chu Asian Champions League-ah hian an tla fel tawh a; Benfica leh Flamengo boss hlui Jorge Jesus enkawl Al-Hilal erawh Thawhlehni zan second leg-a an chak leh en vawihnih inkhelh belhkhawmah 4-0-a chakin Asian Champions League semi-final an lut a; Saudi Pro League lamah pawh an hmahruaina sawhnghetin, anmahni hnaihbertu Al-Nassr lakah point 12 ngawtin an sang tawh.
Match 28 an chak zawnna kawnga thawhhlawk Mitrovic chuan heti zat game-a goal 81 an thunah goal 26 a thawh a; an chak zawnna inkhelte hi league game 16 bakah domestic cup match thum leh Asian Champions League game kua a ni.
World record siama vawi 28 chak zawn Al-Hilal
