World Veterinary Day hmang
Inrinni khan khawvel hmun dang rualin Mizoramah World Veterinary Day hman a ni.
A hmanna pui ber Aizawlah chuan Indian Veterinary Association bultumin hman a ni a, venterinary doctor leh researcher bakah veterinary lam mithiamte telin AH & Vety minister Er Lalrinawma’n a hmanpui.
Vety Day hmannaah hian CVSc & AH, CAU Selesih-a asst. professor Dr C Lalmuanthanga chu resource person a ni a; Molecular Microbiology & Immunology School of Medicine, Oregon Health & Science University USA-a research titu Dr Jonathan Lalsiamthara Ralte chuan thu a sawi bawk.
World Veterinary Day hi kumtin April thla Inrinni hnuhnungbera hman thin a ni a. Kumin hi a vawi 23-na niin, thupuiah “Promoting Diversity, Equity, and Inclusiveness in the Veterinary Profession” tih hman a ni. A awmzia chu, veterinary hnathawhnaah hian indaidanna thiah a, intluktlanna leh he hna in hma a sawn zel theihna’n a funkim thei ang bera hna thawh hona lam a kawk.
Kum 1863 khan Prof J Gamgee chuan Europe-a veterinary doctor-te chu inkhawmpui a neihpui a. Ran hriselna lam, a bikin ran leh ran atanga inkaichhawn theih natna chungchang (epizootic diseases) leh, chu’ng natna laka invenna tur lam sawi ho a ni. He conference hi khawvel pum huap anga a hmasaber a ni. Kum 1959 khan 15th International Veterinary Congress meeting chu Spain-ah neih niin, World Veterinary Association (WVA) a lo piang a. WVA-in a tum ber chu, science thiamna pung chho zel behchhana veterinary hna (profession) dah pawimawh leh ran hriselna ngaihpawimawh, ran enkawlna tihchangtlu, him leh tha zawka ran vulh leh enkawl, a tul dana ran dahhran (quarantine leh isolation) te leh a dangte a kawk a ni
Kum 2000 atang khan khawvel pum huap angin World Veterinary Day hi hman tan a ni.
Aizawl bakah district dangah pawh ‘World Veterinary Day 2023 hi hman a ni a, he ni pual hian North Vanlaiphaiah chuan KVK Serchhip, AH&Vety department leh North Vanlaiphai VC te tangho buatsaihin ‘Anti-Rabbies Awareness & Vaccination Programme’ hman niin, a thlawna ran entirna buatsaih a ni a. Ui 74 chu ui â hri danna a thlawna pek an nih bakah ranvulhtute hnenah rulhut hlo sem a ni.
World Veterinary Day hmang
![](https://theaizawlpost.org/wp-content/uploads/2023/05/vety.jpg)