Hmeichhe tennis kum kharna khelh zawh tak WTA Finals-ah Iga Swia-tek leh Jessica Pegula chuan final match khelin, Pole zawk hian 6-1 6-0-a American player sawpin world number one nihna pawh Aryna Sabalenka kut atangin a lakir zui leh ta a ni.
Cancun khaw final-ah hian kum 22 mi Swiatek chuan minute 59 lek chhungin Pegula lakah hnehna nuamsa a chang a, WTA Finals tournament-a a cham-pion vawikhatna niin, WTA Finals trophy a lak hma hian French Open title pathum leh 2022 US Open title a lo sual-chhuak tawh a ni.
Kumin season ending tournament-a a champion rual hian kum 2011 daih tawha kum 21 mi lek ni chunga trophy hawntu Petra Kvitova hnu lama he tournament champion ni leh thei naupangber a ni nghal.
Hnehna a chan hnuah Swiatek chuan season tluana amah thlawp tlattu a team chungah lawmthu sawiin, hniam lai leh san lai nei chunga kum an chhiarna kawngah tun kha an kan lai a nih thu a sawi a, khati ang taka an thawhhona a that chhoh zel chuan a hma hunah beisei tur dang tamtak a la awm thu a tarlang tel.
Kumin WTA Finals singles final hi Mexico ram khawpui pakhat Cancun-a khaw awm danin a zir loh avangin Thawhtanni tlai lamah an khel thei chauh a, mahse, an khelh lai hian ni a lang a, khaw thiang val val hnuaiah world number five Pegula laka a chungnunna a lantir a, tun season-a a vawirukna atan awlsam zetin WTA title a hlawhchhuak.
Swiatek hian Be-larusian Sabalenka kut atangin No. 1 nihna a chhuhsak a ni satliah mai lo a, nikum leh kuminah kum zawnin world number one nihna nen kum a khar thei ta a ni.
Kum 2022 khan Poland nula rothap hian a zawnin match 37 chhung tehreng hnehna a chan hrinchhuah title paruk a la zawn thei a; top-ranked women’s player ni chunga kum a khar hnuah chawlhkar 75 chhung world number one a ni chho ngat ngat a, kumin September thla mai khan Sabalenka chuan a rawn luahlan a, Mexico rama a thiam zual pariatte inelnaa hnehna tluantling chang chungin a hum ngai a luahkir leh ta a ni.
WTA Finals hnehtu Swiatek
