Daily Newspaper

WTO-in United States of America thiamloh chantir

30

World trade Organization chuan US in kum 2018 a China bungrua laka chhiah a laksan avanga trade war awm zui ta chu international trade rules nen ‘inmil lo’ tiin a sawi.

WTO chuan US chuan China-in dik lo takin technology a ruskak tia behchhan a siam chu finfiahna engmah pek a nei lo a ti bawk a. China chuan WTO thutlukna chu lawmawm a tih thu a sawi nghal thung.

Mahse, US chuan WTO thutlukna siam chuan China hmachhawnna kawngah ‘a hmantlak lohzia’ a phochhuak, a ti ve thung a.

US Ambassador Robert Lighthizer, America top trade negotiator chuan US chu hleih nei taka sumdawnna kalpui thilah amah a inven remtih tur a ni, a ti thung a.

“He panel report hian Trump Administration in kum l chhung a lo sawi tawh a nemnghet a. WTO hi China-in technology practice thalo tak a kalpui ti tawp turin a hmantlak loh a ni,” tiin a sawi bawk.

“Panel te hian US-in, China-in intellectual property a ruk finfiahna tam tak a thehluh a hnial lo chungin a thutlukna siam hian chutianga thil dik loh kalpuia tihdamna lam engmah a awm lo,” tiin a sawi bawk.

US-China trade war
China chuan kum 2018 khan WTO-ah Trump administration-in chhiah lak san a kalpui tirhin a zualko nghal a, US in China bungruaa chhiah a lak san hi belh zelin tunah chuan $ 300 billion hu a tling tawh a ni. Khatih laia China-in thu a thehluh lai ngaihtuah tan June leh September 2018 kha chuan US-in chhiah a laksan hu chu $ 200 billion chauh a la ni zawk.

US chuan chhiah a lak san chhan chu China sorkar hmalaknaa technology ruksak, subsiddy leh ‘dik lo taka sumdawnna kalpui’ vang a nih thu a sawi a.

China chuan US-in chhiah a lak san chuan trade regulation a kalh a, ram pakhat chauh bitumna a ni bawk tiin WTO ah a zualko ta a ni.

WTO panel te chuan US hrekna chauh an ngaihtuah thu sawiin China-in a chhanletna te chu Washington-in WTO ah a thlen ve loh avangin an ngaihtuah loh thu an sawi thung a.

Khawvela la awm ngai lo sumdawnna lama buaina nasa tak a thleng tia sawiin panel member pathumte chuan ram pahnihte chu an harsatna te chingfel tura inbiakna nei turin a ngen bawk.

China Commerce Ministry chuan thuchhuah siam nghalin US chuan World Trade Organisation (WTO) thutlukna an zah an beisei thu an sawi nghal thung.

WTO sawisel fotu Trump administration chuan thutlukna siam hi an khinglet mai thei thung a. He thutlukna hian dan lama harsatna thlen thei bawkin a chhan chu Washington chuan appelate body-a judge ruat tur a dan sa tawh vang niin inkhing zui zel tur pawh ni se case ngaihtuah tura judge awm thei chin tura bituk zat pawh an awm lo mek a ni.

US leh China trade war avang hian khawvel pumah sumdawnna lamah harsatna nasa tak a thlen phah bawk a. US chuan China-in a policy a thlak duh lo a nih chuan khauh zual zawka chet lak a neih zui zel tur thu a sawi bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy