Awmawmtei Pa
2023 Theme : Radiographers are the forefront of radiation safety.
Mizoram MLA Election vote thlak kan zo ta, Constituency hrang hrang MPF Common platform-ah hriselna kawnga hmasawn nan leh thingthlang mite tan khawl neih awlsam tak si kan neih loh avanga, hmunpui zawk pan fo a ngaih loh nan District Capital Hospital-ah CT Scan khawl: Thenzawl khuaah Ultrasound dah a ni ang tia MLA in-candidate-te intiamna hriat tur a awm.
Thingthlang mipui ten damdawi in hmanrua changkang zawk kan awmna atanga pan awlsam tak chhawpchhuah hi kan mamawh em em a ni. Tu party pawh lo sawrkar se, he thil hi sawrkar tharin tih hlawh tlin ngei ngei tur thil a ni. Kum 2022 YMA General Conference Agenda-ah pawh khawl tha zawk District Hospital, CHC, PHC level-a dah tura sawrkar nawr tih pawm kha a ni a, tunah pawh hian Central YMA hmalak mek na hi hlawhtling se tih hi thingtlang mite duh em em a ni.
Le vawiin Day thupui ah lut ta ila. Radiology han tih hian mi nawlpui chu kan bo deuh mai thei. Radiology chu radiowave/electromangnetic wave hmanga khawl siam chhuah, natna hmuh chhuah nan leh tih damnaa an hmante a huam a ni. Kan hriatthiam dan awlsam berah chuan X ray te, CT scan, Flourouscopy, mammography, MRI, Ultrasound, PET scan, Cobalt therapy leh adangte a huam a, heng khawlte hian wave hrang hrang sound wave hmang te, magnetic wave hmang te, x ray(electromangnetic wave), gamma, beta radiation hmangte an ni hlawm a, heng wave leh radiation hmang te hian natna hrang hrang hmuh chhuah nan leh a tih dam nana hman te an ni a. Radiology tel lo chuan medical science hi a kal thei tawh lo a ni.
Father of Radiology German Physicist W.Roengen an kum 1895 November 8-a X ray a hmuhchhuah hnu atang khan Medical field chu a sawi danglam dawrh a, he Ray mak tak, taksa tawn tlang thei hi a hmuhchhuah tirh khan a danglam em bik avangin, Ray hriat loh X Ray a phuah ta hial a ni.
Radialogy chhungah hian radiowave chi hnihin a then theih a, taksa tana tha lo thlen thei(harmful radiation) leh taksa tana hriselna thlen loa ngaih (unharmful radiowave) MRI, Ultrasound te an ni.
Tun tumah chuan a enkawl dan leh a hman dan ruahmanna fel tak ngai a tih tur Ray bik(harmful radiation) chungchang lo thlurbing ta bik ila. Kum 2023 World Radiography Day thupui ang in, Radiographer(Mizoram sawrkar hnuaiah chuan X-Ray/CT Scan technician tia designation pek a nia, tin, X ray/Cobalt therapy/gamma ray khawih technician/technologist te a huam tel awm bawk e, chuvangin Radiographer tia sawi aiah X Ray technician tiin kan ziak chhunzawm tawh mai ang) te hi mipui, damlote tan X ray laka an him leh zual nana hmahruaitu, kawhhmuhtu a kila lung tangkai em em te an ni.
Mizo mipui nawlpui hi X ray chungchangah kan hriatna a la zau tawk lo hlein a hriat a; he X Ray/alpha, beta ray chungchangah kan bengvar tawk lo hle. X ray Technician-te hian mipui, damlote tana him zawk nan X ray Safety Technique hrang hrang an lo kawhhmuh thin, entir nan ; CT scan te, X Ray ti tur dam lo awm pui ngei ngei ngaiah Lead Apron, thyroid shielding lo hak tir te, raipuar X ray turah Abdomen shielding lo siam sak te leh Gonad shielding hman tir te leh dam lo assist/pui ngai miah lo, lo puih tum Room pawn a awm tir te leh procedure dangteah Radiation tul lo a, an lo dawn ve palhna tur lakah mipui himna turin awm dan tur an lo kawhhmuh zel thin a ni.
Radiation chungchanga India thuneitu sang ber, AERB(Atomic Energy Regulatory Board) in radiation worker(X ray/CT scan etc) dose dawn tur zat bithliah mumal tak a tuk sak a, 5.0rem(5000mrem) kum khat chhungin, a pel tur a ni lo a: kum 5 chhungin 100mSievert a pel thiang lo bawk.Nuclear reactor hmuna thawk eawh hei ai in an dose dawn tur sak asang deuh thung. Tin, mimal tin te radiation kaihhnawiha thawkte ni lo(Public dose) dose 1 msv a bithliah sak thlap bawk.
India/Mizoram ah, radiation chungchanga thuneitu sang ber AERB in, hospital, private, clinics thlenga radiation pe chhuak thei khawl bun a nih dawnin kaihhruaina mumal tak, radiation laka mipui te him nan Rules felfai tak a duang a, chutiang zawm lo chu khawl an bun a remti lo, hei pawh hi zawm lo hospital,clinics an awm nual niin a lang, entir nan chhim lama Private hospital pakhat chu an X ray room leh Laboratory room indaidanna bang kha Plywood an hmang a, playwood te, thing phek te hi X ray-in a su tlang vek thei a, X ray room bula Laboratory room a, hnathawk awm khan, tul loah radiation siper kha a dawng ve nualin a rinawm ; a hriselna pawhin a tuar thei a ni tih kan hriat a tul hle. Radiation chhuak thei lo turin, X ray/CT scan, fluoroscopy room te hi bang/wall cement concrete 230mm a chhah a siam ngei ngei tur a ni a; a kawngkharte pawh Lead sheet/suana bel ngei ngei tur a ni. Hei hi mipuite him nan leh Technician-te tan himna pawimawh em em a ni.
Radiation effect hi chi hniha sawi a ni: dose sang tak dawn avanga, chawp leh chilha lang ngal thei leh kum tam tak hnua lang chhuak thei te a ni (Genetic effect). Entirnan, Indopui pahnihna a, Japan rama Atom bomb thlak effect/nghawng te kha radiation chawp leh chilha lang chhuak nghal a nih avangin radiation effect chawp leh chilha lang chhuak nghal entir nan a hman theih awm e. Tin, kha Bomb effect radiation avang khan kum tam tak hnuah pawh nghawng tha lo a lang zel thei a, an thlah te, an tu leh faah te, piansualna/rilru lama rualban lohna leh syndrome chi hrang hrang a la awmtir thei fo a, chu chu Generation effect/genetic effect tia sawi a ni thin.
Covid 19 len lai khan fak hlawh lo valrual an sawi ang mai in, X ray/CT scan technician te hi a kila lung pawimawh tak an ni.Covid 19 vei te kha, an chuap X ray leh CT scan a, scan sak ngai a tam zawk an ni a, Covid damlo te, Physical contact ti nasa ber te an ni hial awm e. 24 hours duty neiin zan laia PPE ha a Xray/Scan tih chang a tam thin hle. Sawrkar hnathawk chu an hnaa rinawm taka thawh a, Social media PPE ha a, tlangau/in post tul ti ve lem lo an nih avangin, Covid 19 len lai khan an hnathawh dan kan hriatpui tam awm lo e. Mizoram Legislative Assembly hnuhnung ber neihah khan Constituency MLA thenkhat khan an bial chhung PHC,CHC, District Hospital ah X Ray khawl bun a la nih loh thu te, technician an mamawh thu te, Lawngtlai District Hospital ah CT Scan an mamawh thu te Assembly Session-ah khan sawi rik a ni. Thingtlang mirethei tam tak ten khawpui zawk pana an tha leh zung, sum leh pai an sen nasat nachhan chu medical facilities District hospital-a a that loh vang a ni. Kut zungte ulh mai mai pawh X ray turin hmun hla tak tak an pan a tul a, sum an insen nasat phah hle. PHC level tinah hi chuan X ray khawl man to lo tak nuai nga(5) man bawr vel hi lei tur a awm tawh a, Portable X ray tal hi chu dah kan mamawh ta hle a ni.
Tin, District Hospital tinah hian CT SCAN bun theih ni tawh se la, sawrkar tan pawh a Operate turin, technician pahnih khat lak belhin a tih theih reng, Doctor lak belh ngai lo in; CT scan result siam te hi a lo tih theih reng nia maw le! Sawrkar tan manpower lak nan sum insen a ngai lo in, District tinah hian CT Scan khawl hi a lo dah theih reng mai, tunlaiah Technology a sang tawh a, CT Scan image thawnna Apps hmangin, USA, UK, AIIMS doctor thiam te kha CT Scan image kan thawn mai ang a, an nin mi pakhat zel ah, en man an lo la ve mai ang (per head) CT SCAN image en tura Doctor lak belh a ngai lo va, Doctor lak nan sawrkar insenna tur awm miah loin a OUTSOURCE theih reng a ni. Khawl leina leh Technician chhawrna nen sum tlem tein a lo tih theih reng mai!. Mizoram a Private Hospital leh Clinics thenkhat hian hetianga CT Scan etc result siam Outsource hi ti an awmin an sawi. Vawiin World Radiography Day-ah hian X Ray/CT Scan te hi Doctor chawh bak radiation dawnin hriselna tan pawi a thlen thei tih hre thar ila, X Ray technician, Radiographer ten mipui te, damlote leh dam lo buaipuitute tana Radiation an him nan tih tur leh tih loh tur te an sawi te zawm zel i tum ang u.
World Radiology Day Chibai u le.