Site icon The Aizawl Post

XXXTentacion kahhlum thuah mi 3 thiam loh chantir

XXXTentacion kahhlum thuah mi 3 thiam loh chantir
2018-a rapper XXXTentacion kahhlum thuah Florida jury-te chuan mipathum chu tum reng vanga tual thah thuah thiam loh an chantir. Thiam loh chantir te hi Michael Boatwright, 28, Dedrick Williams, 26 leh Trayvon Newsome, 24, te an ni. Tualthattu zinga a palina, Robert Allen, kum 25, chuan tum reng vang ni lo a tualthat palh a nihna inpuangin, midang pathum te thiam lohna tilang thei zawnga thuhretuah a tang zui nghal a ni.
XXXTentacion, a hming tak Jahseh Onfroy hi June 2018 khan Florida-a motorcycle dawr kawtah kahhlum a ni a, a thih hian kum 20 mi chauh a ni. XXXTentacion hi RIVA Motorsports atanga a kal tur chu mipahnihin a car an pan a, pakhat zawkin kapin, pakhatin a Louis Vuitton bag, dollar 50,000 awmna chu lak sakin, SUV dumin an tlanbo zui ta a ni.
Prosecutor lam chuan Boatwright hi silai hmetpuaktu ber niin an sawi a, Newsome hi pawh hi silai keng, bag latu zawk niin an sawi a, William hi an tlanbona SUV khalhtu niin an sawi bawk. An pathum hian thiam lohna an neih loh thuin tan an khawh ve thung a ni.
XXXTentacion hian SoundCloud-ah singles leh mixtape eng emaw zat a tihchhuah hnuah mi hriat a hlawh tan a, 2017-ah a album hmasa ber ’17’ a tichhuak ta a ni. Hemi kumah tho hian hmeichhe pakhat, naupai lai kut thlakah puh a ni a, house arrest-a a awm reng hnuah March 2018-ah a zalen ta chiah a, June 2018-ah an kaphlum zui ta mai a ni.

Exit mobile version