Mizoram chhunga badminton inelna lian ber pawl leh ngaihhlut hlawh Yamaha MBA Inter Club Badminton Team Championship 2024 chu Inrinni liamta khan zawh fel niin, he tournament-ah hian category pakuaah inelna kalpui a ni a, category pahniha champion kawp thei Mizoram Police Badminton Club chu overall champion an ni.
Yamaha MBA Inter Club-ah hian Under-15 Boy’s & Girl’s Team, Under-19 Boy’s and Girl’s Team, Men’s team, Women’s Team, 35+ Men’s Team, 45+ Men’s Team leh 55+ Men’s Team-ahte inelna buatsaih a ni a; club hrang hrang 29 atangin team 88 inlanin, player 300 chuang an tel.
Men’s team champion Bawngkawn
He tournament-a ngaihhlut hlawh ber men’s team final-ah Bawngkawn Badminton Club (BBC) leh Chanmari Shuttlers Club (CSC) an in tawng a, tun dinhmunah Mizoram chhunga player nei tha ber ve ve an ni a tih theih awm e.
First singles-ah Joseph Lalhruaitluanga, BBC leh C. Lalramzauva, CSC-te an inkhel a, straight sets hmangin C. Lalramzauva a chak.
Hemi zawh hian Lalrinawma leh Laldintluanga Tlau, BBC-te inkawp chuan Subham Yadav leh Steven Lalhriatpuia, CSC-te tangdun chu first doubles deciding game-ah an hnehlet ve leh a, 1-1 a ni.
2nd singles khelh a ni a, BBC lam atangin Malsawmsanga (Esha) penchhuakin, CSC lam atangin Lalramdinthara a inlan thung.
Esha hian straight sets-in a tumpui a hneh ve leh thung a, BBC lam in 2-1-in hma an hruai.
Chutih laiin reverse doubles-ah C. Lalramzauva leh Joseph VL Ringngheta, CSC-te tangdun chuan Mano Malsawmdawngliana leh Joseph Lalhruaitluanga, BBC-te inkawp chu straight sets thoin an hneh leh a, 2-2 a ni.
Deciding match pawimawh tak khelh a ngai a, he match khel tur hian BBC lam atangin Laldintluanga Tlau a inlan a, CSC lam atangin Isak Lalmuanawma a chhuak thung.
Champion tur zawnna a ni a, point an innihrual zak zak hnu point pawimawh laiah Dindina rawn chetha zawkin, straight sets-in a chak a, Bawngkawn Badminton Club a champion-pui!
Women’s team lamah Saron Badminton Club leh Chanmari Shuttlers Club-te an intum a, an in hnehtawk hle.
First singles inkhel hmuhnawm takah Ramdinmawii, CSC chuan Laldingpuii, SBC chu deciding game-ah a hneh hram a; doubles-ah erawh Laldingpuii leh Abigail Lalthazuali, SBC-te tangdun chuan TC Lalthazuali leh Lalngaihsangi, CSC-te inkawp an hneh thung.
Deciding match khelh leh a ngai a, SBC lam atangin Abigail-i a rawn ding chhuak a, CSC aiawhin Lalngaihsangi a rawn inlan thung.
Inhnehtawk taka an khelh hnu deciding game-ah SBC lamin chakna changin, champion trophy ngaihhlut hlawh an chawi haw.
Overall champion Mizoram Police
A pumpuia gold la hnem ber hnenah Overall Champions Trophy hlan a ni a, a dawngtu chu Mizoram Police Badminton Club (MPBC) an ni.
He tournament-ah hian Saron Badminton Club chuan category paliah final an lut a, champion tura beiseiawm ber an ni.
Chanmari SC pawhin category pathumah final an lut bawk. Chutih laiin, an final luhnaa champion ve ve awmchhun MPBC-te overall champion an ni thung.
Anni hian 35+ men’s team leh 45+ men’s team-ah gold medal an la a, men’s team-ah bronze medal an dawng bawk.
Junior huangah Aizawl pawn chetha
Tun tumah hian player chhuak leh champion-te thlirin Mizoram badminton hmelhmang a inthlakdanglam hle a tih theih.
Junior category lamah Aizawl pawn lam an chetha hle a, category pathumah an champion.
Under -15 girl’s team-ah North Kolasib GSA-in Saron Badminton Club hnehin gold medal an hlawhchhuak a under-19 girl’s team lamah pawh Mamit Badminton Club-in Saron Badminton Club hnehin, champion nomawi an chawi haw.
Under-19 boy’s team inelna hmuhnawm takah Serchhip Kawnpui Badminton Club-te chuan Badminton Club Republic an hneh a, gold medal an vaw chhuak bawk.
Under-15 boy’s team huangah erawh Hlimen Badminton Club-in 08 BC Mamit Team an hneh thung a, Aizawl khawpui chhung atanga junior category bika champion thei awmchhun an ni.
Result hrang hrangte:
Under-15 Girl’s Team
Champions: North Kolasib GSA
Runner-up: Saron BC
Under-15 Boy’s Team
Champions: Hlimen BC
Runner-up: 08 BC Mamit
Under-19 Girl’s Team
Champions: Mamit BC
Runner-up: Saron BC
Under-19 Boy’s Team
Champions: Serchhip Kawnpui BC
Runner-up: BC Republic
Men’s Team:
Champions: Bawngkawn BC
Runner-up: Chanmari SC
Women’s Team:
Champion: Saron BC
Runner-up: Chanmari SC
35+ Men’s Team:
Champion: Mizoram Police BC
Runner-up: Chanmari SC
45+ Men’s Team:
Champion: Mizoram Police BC
Runner-up: Zotlang BC
55+ Men’s Team:
Champion: Ramhlun United BC
Runner-up: Saron BC