Yamuna lui then fai hna thawk tan

Yamuna lui then fai hna thawk tan
Delhi assembly inthlan zawh taka au hla ring tak, Yamuna lui then thianghlim chu Pathianni atang khan thawh tan a ni ta.
Bawlhhlawh hui khawmna, hnim to samna leh then faina hmanruate nen thawh chhuah a ni a. Hemi hma lawk hian Delhi Lieutenant Governor VK Saxena leh chief secretary kaihhruaia thukhawmin lui then fai hna hi thawh tan thuai turin an ti a ni.
Lieutenant Governor pisain thuchhuah an siamah chuan Yamuna bawlhhlawh tur hi ‘chhawng liin’ ven leh beih a ni dawn tih an tar lang.
“A bul tan nan Yamuna lui hi bawlhhlawh leh hnim tote seng hna thawh phawt a ni a. Najafgarh Drain, Supplementary Drain leh kawr lian dang zawng zawngah a dawtin thawh zel a ni ang,” an ti.
Ni tin STP (sewage treatment plant) chu vilin engzat nge bawlhhlawh a sawngbawl theih en a ni ang a, hun bi neiin STP thar siam dan tur pawh ruahman niin bawlhhlawh MGD 400 sawngbawl thei reng tura tih tum a ni.
L-G pisa thuchhuah hian lui hi kum thum chhunga then tum a ni a, “Hna hi agency leh department hrang hrang – DJB (Delhi Jal Board), I&FC (Irrigation & Flood Control Department), MCD (Municipal Corporation of Delhi), Environment Department, PWD (Public Works Department) leh DDA (Delhi Development Authority) tanghova thawh a ni ang,” an ti.
Kar tin hna thawh hi thlirho thin a ni ang a, Delhi Pollution Control Committee (DPCC)-in industry-te chu luia paih lo turin an vil ang a. Hei hi lui tui a thianghlim telh telh nan leh a ven zel nana tih a ni.
Yamuna-ah hian thil bawlhhlawh tak tak paih luh a tam hle a, BJP chuan assembly inthlan hma khan then fai ngei a tiam.
Inthlan dawnah vek khan Arvind Kejriwal chuan Haryana sorkarin ‘Yamuna luiah tûr an pawlh’ tih a lo sawi tawh bawk.
Prime Minister Narendra Modi-a chuan inthlan hma vek khan BJP chuan ‘Yamuna hi Delhi chhinchhiahna atan’ an siam dawn tih a sawi bawk a. BJP hian kum 27 hnua a vawi khat nan Delhi-ah hnehna an chang zui.
Ningani khan Union Minister Harsh Malhotra chuan an party chuan Yamuna then fai hna an tan thuai dawn a, hun tiam chhungin an zo dawn tih a sawi bawk.
“Kan ngaih pawimawh ber chu bawlhhlawh bawm hi pakhat mah bawlhhlawh awm lohnaa siam a ni,” tiin Malhotra hian news agency ANI hnenah a sawi.
Yamuna then tumna hi January, 2023 atang khan National Green Tribunal (NGT)-in L-G Saxena kaihhruai high-level committee-in a lo kalpui tan tawh a. An tum ber chu lui bawlhhlawh zel ven leh a thianghlimna tura hma lak a ni a. Delhi-a industry-te pawh luia bawlhhlawh paih lo tura tih an ni.
Vawi nga an thutkhawm hnuah hetih laia sorkar, Kejriwal-a kaihhruai Aam Aadmi Party (AAP) chuan Supreme Court-ah NGT-in high-level committee kaihruaitu atana L-G a ruat chu a khing.
Hetih laia Chief Justice of India, DY Chandrachud chuan NGT-in a ruatna hi a tihkhawtlaisak a, Yamuna-a hmalakna pawh a tawp rih a. Kumin kum tirah khan lui hian a bawlhhlawh lai ber a thleng a ni.