Kumin October ni 24-a Biate-a YMA Inkhawmpui Lian neih tura agenda chu nimin khan Central Co-ordination Committee-in a thlifim a. Agenda thlitfim hi category pahnih ‘YMA khawih’ tih leh, ‘sawrkar khawih’ tia thliar hran a ni a. YMA khawih agenda paruk leh sawrkar khawih agenda pahnihte hi, a nihna takah chuan, ram hnuk khawih thil tak tak vek a ni, a tih theih ang.
YMA agenda zinga environment humhalh chungchang hi a pawimawh hle mai a, environment humhalh that loh avanga khawvelin harsatna a tawh mek ‘global warming’ chungchang pawh kan hre bel hle tawh a, kan hria mai ni lovin, ram hringin a la khuh that em em Mizoram pawh hian a tak (practical)-in kan tuar chho mek tawh a nih hi.
Khawvel a awm chhung hi chuan khawvel inher danglam zel mila khawsak phung leh hmasawnna kawng hrang hrang her rem ve zel a tul thin a, chu chu kan environment nena inbuk tawka kalpui kan thiam loh chuan, hmasawnna kan tih hi a hnuah hreawmna leh harsatna thlentu mai a ni dawn tih a chiang. Tunah pawh hian ‘tui hna’ ah kan buai mek tawh a ni a; hei hi environment humhalh dan tawk kan thiam loh vang a ni ber awm e.
Environment humhalh tur hian eizawnna kawng her danglam a ngai tih a lang a, chu chu shifting cultivation bansan zawnga eizawnna ngelnghet kan din chhoh a pawimawh, tih hi. He lamah hian sawrkar (sawrkar lo awm tawh zawng zawng) hian hma an la na tawk lo vek a tih theih awm e.
YMA inkhawmpui thurel tur zingah pawh hian environment humhalh chungchang hi agenda hmasa berah dah a ni a, ngaih pawimawh a hlawh hle tih a hriat a; hei hi a lawmawm hle. Environment humhalh kawngah hian sawrkar department nena thawhhona neih a pawimawhna tur chu, kum tina ramngaw thiata hal kang dur dur lo zawnga eizawnna dang siam dan turah hian a ni.
Inthlanpui kan hmachhawn chho mek a ni a, sawrkarna siam tuma thapui chhuah mek party tin hian an manifesto-ah environment humhalh an kalpui dan tur ruahmannate mipui hnenah chhawp chhuak thei bawk se a duhawm hle a ni.
YMA agenda: Ram hnuk khawih
