YMA chu Mizoram chhung leh pawn thlenga Zofate min phuar khawmtu mitin huapzo a ni tih MLA Lalrinsanga Ralte chuan a sawi.
June 15 – YMA Day kha Serlui bialtu MLA Lalrinsanga Ralte hian a bial chhung North Hlimenah a hmanpui a. YMA Day lawmpuina atan sumfai leh silpauline engemawzat a hlan.
YMA Day vawi 91-na hmang tu zawng zawng chibai a buk tih sawiin, YMA chu pawl ropui leh zahawm tak, Mizoram chhung leh pawn thlenga Zofate min phuarkhawmtu, mitin huapzo a ni tih a sawi a. Kohhran leh political party hrang hranga awmte pawh zaikhata kan luanna a ni, tiin, YMA chu Mizote Mizo na lanchhuah tirtu, chhiat thata che nghal thin, pawl ropui tak a ni tih a sawi.
Ruihhlo chu hnam hmelma a ni a, a laka fihlim turin thalaite a ngen tih a sawi a. Taima tur leh hnathawh zak lo turin a sawm tih a sawi.
YMA member-te chu ram leh hnam humhalh kawngah theihtawp chhuah thin tura fuihin, “Pathianin Mizote hi hnamah min din a, ram min pe a, Pathian min pek kan ram hi nghet taka kan luahzel theihnan thalaite nationalism-ah kan harh thar a, huaisenna leh rinawmna nen kan ram hi kan enkawl a tul a ni,” Lalrinsanga Ralte hian a ti.
N.Hlimena YMA Day lawmnaah hian YMA Kumpuan thupui “Ruihhlo Do” tih inzirtir a ni a; lengkhawm zai hmanga intihsiak a ni bawk.
YMA hi Zofate min phuarkhawmtu – Lalrinsanga Ralte
