Mizoram Larsap General Vijay Kumar Singh chuan nimin YMA Day puala mipui hnena thuchah a sawi zingah, ‘hnam bil hrang hrang inkara inunauna chawilar te, aia upa zah tur leh, mahni hnam tobul nghet taka vuan turin’ tih te a tel a. Larsap thuchah hi tawi fel tak, ril tak leh huap zau tak a ni.
Heng zinga pawimawh ber pakhat chu ‘Aia upa zah’ hi a ni. Kan pi leh pute Zawlbuk hun laia ‘aia upa zah’ dinhmun leh tun huna ‘aia upa zah’ dinhmun chu a inthlau tawh hle a, a inthlauh dan hi ‘lei leh van’ ang a ni ti ta ila, kan sawi uar lutuk lo maithei a ni.
Mizoram Upa Pawl pawh hian ‘aia upa zah’ hi an vei hle mai a, zirna in bul hnai hmun remchang laiah ‘aia upa zah’ tura ngenna thuziak an tar thin a. Hetianga khawlaia thuziak tar a nih tawh chuan, inngen ngai khawpin ‘aia upa zah’ hi kan zawm tha ta lo hle tihna a ni ber mai.
YMA leh ‘aia upa zah’ han tih tawp mai chu, a YMA rawngkai vak lo kan ti a ni maithei a, mahse YMA-a tel tam berte hi ‘Young’ an ni a, ‘young’ zingah hian aia upa zah nachang hre lo an tam tawh a nih chuan, hmalakna remchang ber chu YMA a ni ngei ang.
Tun laia thalai tam tak hi chuan ‘aia upa zah’ tih tawngkam pawh hi an hre tawh mang lo hialin a rinawm. Zirlaite zingah, school uniform ha chunga khawlaia zial pak khu hlat hlat ngam/duh an awm ringawt te pawh hian ‘aia upa zah’ kawnga kan dinhmun chu a hril chiang hle. School uniform ha chunga khawlaia zial zu pêt pêt ngam zirlaite hi upa zawkte hian hauin zilh ta se, insual an ngam hial tawh mai awm e.
YMA Day vawi 90 zet kan hmang ta a, tun atanga kum 10-ah chuan YMA Centenary te pawh kan lawm duh ngeiin a rinawm. Chutih hunah chuan, Centenary huna thleng hman tura kan duh (Goals) zingah, ‘Mizote chu aia upa zah hnam an ni’ tih te hi ni thei se. Min rawn tlawhtu khualzinmite pawhin, ‘Mizoram chu aia upate zah state an ni’ tih tawngkam social media lama an thehdarh theih tur khawpin tan la ila. YMA hian branch tinah ‘aia upa zah’ tih thupuia neiin, YMA kum puanah te pawh hmang chho ve nawk nawk zel ila, tun ai hian hma kan sawn phah ngeiin a rinawm.
YMA leh ‘aia upa zah’
