Daily Newspaper

YMA leh Ex-MNA in MP thlavang hauh

8

Central YMA leh Ex-Mizo National Army chuan a hrang ve ve a thuchhuah siamin, Mizoram MP K Vanlalvena laka Assam sawrkarin hma lak a tum dan chu an demin, a tawp thlengin a thlavang an hauh dawn tih an sawi.

Central YMA thuchhuak chuan, July 26 tlaia Mizoram chhunga Assam Police-ten Mizoram Police camp an luhchhuah avanga inkahna thleng chungchangah, Mizoram Rajya Sabha MP Pu K. Vanlalvena chu huaisen takin ram leh hnam chhanna turin a tawngchhuak a ni tiin, lawmawm a tih thu leh a thlamuan thlak a tih thu a sawi a. Ram leh hnam tana theihtawpa chhuaha huaisen taka ke pen zel turin duhsakna a hlan tih a sawi bawk.

Hetihlaia a thusawi avanga Mizoram MP-in vauna a tawk leh Assam sawrkarin man tuma New Delhi-a police tira hma a la chu Central YMA chuan a dem takzet tih sawiin, ‘Assam sawrkar hi kan MP chunga a hmalakna zawng zawng hnukkir vek turin kan ngen a. Kan MP chungah hian engpawh thleng se, YMA chu theihtawpin a thlavang hauh tur leh a tul anga hma la turin a inhuam reng a ni,’ a ti.

Ex-MNA Gen. Hqrs. pawhin thuchhuah siamin, ram leh hnam chhanna atana theihtawp chhuahtu Rajya Sabha MP Pu K Vanlalvena Assam sawrkarin a vau leh, a man tura Delhi-a police a tir hial chu an ngai thutak hle tih a sawi a. Assam sawrkar hnuaia police pakhat ve maiin, social media kaltlanga Mizoram MP tham lo taka a ti pawh enliam harsa a tih thu a sawi.

‘Mizoram MP Pu K. Vanlalvena hi Assam sawrkar hian a vau leh a nih chuan Ex-MNA hi a hmaah kan ding tlat dawn a. Assam sawrkar hian hma lak chhunzawm zel a tum a nih chuan Ex-MNA hi min paltlang phawt a ngai ang tih lo hria se. Kan pi leh pu, min thlahtute ram sahzau sa humhalh tur hian Ex-MNA hi engtik lai pawha rammut leh kan inpeih reng a ni tih Assam sawrkar hian lo hria se, Zofate hi hruikhat vuanin kan tangtlang vek a ni tih hriain min namnul mai mai lo turin kan duh hle a ni,’ a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy