Daily Newspaper

YMA president hna bansan mai turin thu rawn

15

Sub Hqrs. YMA Mamit president chu Mamit bialtu MLA kutke ber leh political party pakhat huangchhungah a hun tam zawk a hman tak avangin YMA zahawmna leh thianghlimna tihbawrhban a nih lohna atan president a nihna bansan mai turin thu an rawn tih Congress party chuan an sawi.

Mamit Central Block Congress Committee thuchhuak chuan, Mamita tualchhung chanchinbu – Mamit Times-in RTI hmanga a dilchhuah, Mamit bialtu MLA LAD Fund hmanna tarlanah Sub-Hqrs YMA Mamit hminga hnathawh pahnih – Sub-Hqrs YMA office Mamit thawmthatna tur cheng nuai 3 leh Mamit Bazar Veng – Hmunsam Road retaining wall remna cheng nuai 5 a awm thu tarlangin, ‘Sub-Hqrs YMA office leh Committee Room cheithata tihchangtlunna tur sum an hmu hi kan lawmpui takzet a. Amaherawhchu MLA Fund lakchhuah atanga kumkhat tling tep tawhah pawh thuamthat ala ni lo tih YMA hruaituten an sawi a ni,’ a ti.

Bazar Veng leh Hmunsam Road-a retaining wall pawh estimate nuai 5 ni siin, lungrem chu Rs. 50000 an seng angem tih tur chauh a nih thu te;

Sub-Hqrs YMA Mamit tana MLA LAD Fund pekchhuah Mamit Times tarlan danin, 2019 tawp lam leh kumin kumtir lama lakchhuah a nih thu te; sum hi Sub-Hqrs YMA president seal hmanga lakchhuah a nih hnu kum khat dawnah pawh Sub-Hqrs YMA OB leh executive committee hnen a thlen loh thu te; OB leh SEC phalna leh hriatpuina tel loa president-in ama thua a kalpui chu YMA kalphung bawhchhiatna nia an hriat thu Mamit Congress hian an sawi.

Sub-Hqrs YMA Mamit chanchina thil la thleng ngailo anih avangin a chinfel dan ngaihtuahpui turin Central YMA an ngen bakah Mamit bialtu MLA chu a Fund pek turte leh an hnathawh zui dan thlirlet thin tura an ngen thu te a tarlang bawk.

Sub-Hqrs YMA Mamit president chu YMA tana a inpeknate fakawm an tih thin rualin, bialtu MLA-in private secretary atana a hman hnuaah erawh MLA kutke ber leh political party pakhat chhungkuaah a hun tam zawk a hman tawh avangin, YMA zahawmna leh thianghlimna, inpumkhatna vawnnun a nih zel nan president a nihna hi chawlhsan mai se titu YMA member zingah an tam thu sawiin, ‘President nihna hi bansan mai se tha kan tihpui a, a thawhpuite rawn loa sum lakchhuah nana YMA president seal a hman chungchangah YMA member-te leh a thawhpuite hnenah ngaihdam a dil ngei turah kan ngai bawk,’ thuchhuah chuan a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy