YMA rorel inkhawm vawi 4-na chu zawhfel a lo ni leh ta. Nimina rorel inkhawmah hian YMA khawih 8 leh sawrkar khawih 4 agenda a awm a. YMA khawihah hian – faina leh thianghlimna, plastic, chhiatna laka invenna, kawngpui, ruihhlo, Mizo tawng humhalh leh CSR chungchangte a awm a. Sawrkar khawihah hian – raltlante, Lokayukta, zirna ina Mizo subject leh education rules chungchangte a awm bawk a. YMA thurelte hi ram leh hnam hnuk khawih pawimawh tak tak a ni.
YMA thurelah hian “Faina leh thianghlimna kawnga hma kan sawn theih nan bawlhhlawh paih dan inzirtirna neih ni rawh se” tih a tel a. Hei hi kan mamawh em em ni bawk mah se, bawlhhlawh paih dan, tawih thei leh thei lo thliar hran dan te, bawlhhlawh a bawma paih tur a ni tihte leh, bawlhhlawh senghawi dan te hi chu a hriat chuan kan hre thawkhat viau tawh a, kan hriat chian em em kan zawm tha duh lo lai tak hi kan harsatna lian tak, kan mutan ber chu niin a lang.
YMA hi sawrkar dan kengkawhtu ni lo mah se, YMA chhungkuaa a dan zam kenkawh kawngah chuan member-te chungah thu a nei a, khauh leh khawng tak pawhin a kalpui ve thei awm e. Sawrkar dan kengkawhtute thawhpuina lamah pawh YMA hi a thawh hlawk thei hle tih chu sawrkar department hrang hrangte nena thawhhona thuthlung an neih thin dan atang hian a lang chiang a ni.
YMA thurel – faina leh thianghlimna kawnga ‘bawlhhlawh paih dan inzirtir’ tih piah lamah hian, faina leh thianghlimna kawnga Mizoram mipuiin tanlakna tur kan neih pawimawh em em chu ‘ei leh in sawngbawl dan’ hi a ni awm e.
Khaw kar kawng laka chaw dawr leh restaureant te, khaw chhunga thingpui dawr, restaurant leh hotel-a ei leh in sawngbawl dan hi a la thianghlim tawk lo hle a. A bikin bazar hmunpuia thingpui dawrte leh kawng laka restaurant/hotel vela ei leh in siam dan leh chhawpchhuah dante hi mawikhai leh thianghlim zawka kan kalpui ve hi a hun ta hle. Hei hi tourism promote-na kawngah pawh hmalakna tur project pawimawh tak a ni nghal bawk.
Damdawi ina kan luh chhan leh damdawi mana kan insenso nasatna ber pawh hi ‘ei leh in thianghlim loh vanga natna hrang hrang’ vang hi a nih a rinawm. He lamah hian nasa taka tanlak kan ngai a ni.
YMA rorel – faina leh thianghlimna
