Daily Newspaper

YMA Sub-Hqrs. Serchhipin ramria duty-te thilpek hlan

10

Mizoram leh Assam ramria buaina thleng avanga Mizoram ramri venhim hna thawktute tan Sub-Hqrs. YMA Serchhip-in vehbur a khawna tlingkhawm, sumfai leh ei leh in tur chu duty-te hnenah hlan a ni.

Sub-Hqrs. YMA Serchhip hian ramri venga thawktute tan chawhmeh leh eitur chi hrang hrang bakah sumfaia thawh duhte tan Serchhip Town chhung – Chhiahtlang, New Serchhip leh Serchhipa YMA Branch 21 atangin a lakhawm a; Serchhip town pawn YMA Hriangtlang branch pawhin an thawh bawk. Hengte August 2 zan khan Serchhip atangin Vairengte panpui a ni a, Sub Hqrs. YMA president Kawlthuama chuan an hmalakna mipuiin an hlut leh an beisei aia tam thilpek an dawng chu lawmawm a tih thu a sawi.

An thilpek hlan turte hi Thawhlehni zing dar 7.00 khan Vairengte an thlenpui a, Joint YMA Vairengte hruaituten lo dawngsawngin, chawhmeh leh thlai bakah eitur – 407 truck trip khat, pik-up truck trip 2 leh 207 truck trip khat bakah sumfai Rs. Rs. 2,95,022 chu an hlan a ni. Sumfai tlingkhawmah hian PAMRA Saizahawla District Serchhip leh MNF Serchhip Block Women Front pek Rs 5000 ve ve tih loh chu mimal leh chhungkaw pek tlingkhawm niin, chawhmehte hi chhungkaw hrang hrang thawhkhawm a ni a, thianho in mautuai leh tumbu an khawrhte a ni hlawm bawk.

Heng eiturte hi Vairengte-a Mizoram police duty-te hnenah hlan niin, Joint YMA Vairengte hnenah a tul apianga hman turin cheng nuai khat hlan a ni a. Saihapui ‘V’ leh Phaisen YMA Branch hnenah Rs. 10000 ve ve hlanin, water filter pakhat theuh ramria police duty-na hmun 6 ah pek vek an ni.

July 26-a state pahnih police-te inkahnaa Assam police kahhliam PC Lalmuansanga, Vairengte chu Rs.5000/- in an kan a, tanpuina hlana kalten engemawzat pai bawkin tuna an hlan bak hi Sub Hqrs YMA Serchhip executive committee (SEC) in a hlan dan tur ala ruahman leh dawn a ni.

Sub Hqrs YMA Serchhip thuchhuak chuan, Assam ramri duty-te hian tanpui an ngaih vang lam aiin, helai ramri buainaah hian mitin kan kal ve a remchang lo a, mahse kan thlawpzia tihlan nan hetianga thilpek pek hi a tul a ni, tiin, pek nise tia an lo rel tawh tihhlawhtlin nan an pe ta tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy