Youth Exchange Programme-ah
state dang zirlaiten ex-CM kawm
Sawrkar laipui Ministry of Development of North Eastern Region (MDoNER) leh North Eastern Council (NEC) bultuma neih, “Ek Bharat Shreshtha Bharat” campaign – Ashtalakshmi Darshan Youth Exchange Programme-ah chief minister hlui Zoramthanga chu a bika sawm a nih anga Thawhlehni khan Mizoram University hmunah inlanin state pawn atanga zirlai lokalte hmaah thu a sawi.
January 15-28 thlenga neih tur Ashtalakshmi Darshan Youth Exchange Programme-ah hian Andaman & Nicobar Islands leh Lakshadweep atangin zirlai 20 ve ve leh faculty coordinator 2 ve ve, an vaiin mi 44 chu MZU-in a mikhual mek a. MNF president ni bawk Zoramthanga hi zirlaite leh faculty coordinator-te nen inkawmin Mizoram chanchin pawimawh leh Mizoramin zalenna a sual atanga remna kan neih tak dan a hrilh a. An zawhna a chhang bawk.
Remna thuthlung avanga Mizoram-in a bika humhimna kan neih hrang hrang leh remna chungchang sawiin, MNF leh India inremna, Peace Accord hlawhtling tak avanga kan neih Mizoram University hmunah state pawn atanga zirlaite leh zirtirtute nen an inkawmho thei chu a lawm hle tih a sawi.
“Mizoram Peace Accord hi India ram chanchina inremna thuthlung ziah tawha hlawhtling ber zing ami, vawiin thlenga remna tlo leh tluantling bera chhal ngam, hunin a finfiah tawh, ram dangte pawhin an remna thuthlung atana an entawn a la ni reng a ni,” Zoramthanga hian a ti.
Remna chu a hlu a, remna kan neih atangin Mizoram pawhin hmasawnna tam tak a hmu tawh, tiin, thangtharte leh chhuan lo awm zel turten ram hmasawnna nasa zawk an neih zel theihnan hlut nachang hriaa remna humhalhtu kan nih a pawimawh tih a sawi a. Remna tel loa hmasawnna tluantling a hmuh theih loh angin, remna in a thlen thin hmasawnna nasa zawk kan ramin a hmuh zel theihnan remna vawngnungtu ni turin zirlaite a chah bawk.
Zirlaite atanga zawhna a chhannaah, Mizoram ramri dep thingtlang khuaa piang leh seilian, naupang rethei ve tak, inhlawhfa chawpa lehkha zir, zalenna suala rammu tawh kha Mizoram chief minister tum thum a nih theih chhan chu Pathian malsawmna bakah a tumruhna vang a ni, tiin a chhang. Harsatna karah pawh tumruhna nghet tak chuan dinhmun tha zawkah a khaichhuak thin a, tumruhna chuan harsatna a paltlangtir thei thin tih a sawi a ni.
Ashtalakshmi Darshan Youth Exchange Programme hi associate professor Dr Zoramdinthara chuan a kaihruai a. MZU professor rual leh zirlai mikhualte nen programme hi hman a ni.
Youth Exchange Programme-ah state dang zirlaiten ex-CM kawm
