Youth Icon runner-up Peter-a’n car dawng
LPS Youth Icon 2024 a Pahnihna Peter Lalnunpuia chuan Wagon R car thar a dawng a, Maruti Suzuki Arena showroom, Edenthar-ah car hlanna hi Thawhtanni zan khan neiin, a car thar hi Pathian hnena hlanna hun LPS neitu Lalsawmliana Pachuau-in a hmang nghal bawk.
2024 Youth Icon star te hi a boruak a la dai tak tak thei lo va, an chetvelna apiangah an huhang a la na viau zel a, two-wheeler bakah car leh SUV dawng te pawh an awm tawh a, thilpek chi hrang hrang an la dawng deuh reng a, Peter-a pawhin Wagon R car thar a dawng ve leh ta a ni.
Peter-a’n car thar a neih theih nan hian a fan-te an thawk rim hle a, car thar hi an tlin thei dawn lo a an hriat deuh avangin secondhand car te pawh an ngaihtuah hman deuh tawh niin an sawi a, chumi hnuah GIG CEO John Lalpeka te nen an inbe fuh ta a ni.
GIG CEO John Lalpeka chuan Peter-a car thar hlannaah hian thusawiin, Peter-a a lawmpui thu leh car a thlan danah pawh rilru puilting leh ngaihtuahna thui tak seng mi ni a hriat thu a sawi a, “Peter-a’n Wagon R a thlang kher hian ngaihtuahna thui tak seng mi a ni tih a lantirin ka hria. A eizawnna atan pawha a la hman tangkai zui zel theih tur leh a maintenance thlenga hautak lo deuh tur a ngaihtuah thleng pha a. ‘Hetiang hian kan lar reng lo mai thei a,’ tiin, nakinah pawh atana phurrit chang zawk mai lo tur leh a la hman tangkai zui zel theih tur a ngaihtuah zawk a ni,” a ti.
Peter-a fans lamin car thar man tur hi an tuak ngah hleihtheih mai loh avangin John Lalpeka chuan, “A gospel singer ber tana car thar man tur tuak ngah theih loh tlat mai chu ni theiin kan hre lo a,” tiin, car thar man an daih lohna chu zawng chu an thawh sak ve ta niin a sawi bawk.
Petera car thar hlannaah hian Icon top 10 star ten an tel pui a, car thar lawmna cake zai dawnah “Happy car thar to you” tih hla phuah chawp a sain an lawmpui bawk.
Youth Icon runner-up Peter-a’n car dawng
