By Mahmuaka Chhakchhuak
Phuahchawp tih hre reng mah ila Pasaltha chanchin ngaihnawm tak tak ngaihthlak tur hi Youtube-ah kan ngahin kan ngaithla uar thin hle mai. Thlahrang lamte, In ropui chanchin leh Mi hausa chanchinte leh Thu tha tak tak leh Zaithiam zai mai ni loin Chawhmeh siam dan thlengin kan khung ve ta vek mai. Kum upa zawk leh naupang tak tak thlengin Youtube chu inawmtleina atan kan hmang emaw tih mai tur a ni ta bawk a. TV hmai hlai tak tak kan neihte atang ngei pawhin Youtube a lo thlir ve theih vek tho tawh avangin a thente phei hi chuan naupang lawm zawng thil chi hrang hrang hmetchhuakin naupang awmtleina atan tak kan hmang ta bawk a nih hi.
A TIR LAMAH CHUAN
Youtube hi Paypal-a thawk mi pathum, Steve Chen, Chad Hurley leh Jawed Karim te ngaihtuah chhuah niin Feb. 14, 2005-ah khan Website thar; www.youtube.com chu an peih a. Steve Chen leh Jawed Karim te pahnih hi University of Illinois Urbana-Champaign-a Computer Science zir an niin Chad Hurley hi Indiana University of Pennsylvania a zir a ni bawk. An hmunpui chu 901 Cherry Avenue, San Bruno, Calofornia US niin Online video sharing atan leh social media platform pangngai atana hman tura siam an ni. You Tube atang hian Youtube Kids, Youtube Music, Youtube Premium, Youtube Shorts leh Youtube TV te pekchhuah a ni bawk a, khawvel hmun hrang hrang atanga hmangtu mi Maktaduai tel takmeuh an awmin kum 2021-ah khan Youtube hian US $ 28.8 Tluklehdingawn a hmuchhuak hial a. October 2006 atang khan Google-in Youtube hi $1.65 Tluklehdingawn in a lei a, a leina man pawh hi tam tham tak a ni.
April 23, 2005-ah khan Youtube-ah hian Video upload hmasak ber a ni a, chu Video hming chu Jawed Karim-a sahuana a lanna ‘Me at the Zoo’ tih a niin kum 2005 May thla atanga midang hmuh theih tura buatsaih a ni. Youtube-a video te hi thlir hlawh tak a niin September 2005-a Nike fakna atana Ronaldinho hmanna Video upload chu Million (Maktaduai) khat thlirtu nei hmasa ber niin Dec. 15, 2005-ah khan Official taka puan a ni. Tlawhtu (Viewer) tam telh telhin Youtube pawh an ti changtlung chho zel bawk a, kum 2014-ah khan minute tina an Video dawn belhkhawm chu darkar 300 daih a ni thin tih an puang a. Kum 2016 alo thlen leh meuh chuan $ Mtd 214 lai sengin Office park nuam tak siamin thawktu pawh 2,800 leng thei turin hmunhma an ruahman ta hial a ni.
TUNAH CHUAN
Engtik atang chiahin nge kan thalaite hian Youtube boruak an hip tih hi hriatthiam a har ang reng hle a, kum rei erawh a la ni hauh lo. Tunah chuan Mizo thalai zinga Youtube-a Channel siam hi chhiar tham takmeuh kan lo awm ta. Keini lam chauh ni loin khawvel letliamahte ngei pawh Youtube chuan huhang nei zelin Television company lian tak tak, BBC, NBC leh CBC te ngei pawh chuan Youtube nen an lo inthlunzawm ta hial a. Youtube chuan awlsamna min siam zelin Chanchinthar ngei pawh a hnu lehah kan en leh ta foin zaithiam, hrang hlui leh thar zaite pawh kan duh hun hunah kan ngaithla thei ta bawk a. Audio Cassette kawl alo tul tawh lo a, Compact Disk (CD) mamawhna pawh a awm ta lo. Engkim mai hi Youtube-ah thlir theih emaw kan ti ta vek mai zawk a, Youtube-a thlir tur awm lo chu kan ngai ho ti tih deuh tlat tawh hial mai.
Tunhma deuh lawkah khan chuan Aizawl leh Khawzawl emaw Lunglei leh Aizawl inkara Sumo tlante hian Car Tape-ah Computer atanga CD-a Playlist an siam chawp hlate hi min ngaihthlaktir thinin Pendrive-a hla an dahte pawh min ngaihthlaktir fo bawk a. Tunah erawh chuan tumah rengin CD leh Pendrive hmang tawh loin Car Tape leh Smart Phone chu Bluetooth hmanga thlunzawmin Youtube-a an duh duh chu an hmet chhuak tawh mai a ni. Chu chu Driver chanvoa ngaihna lian tak kan nei hlawm lehnghal a, seat hnung bera thu tan phei chuan ka ngaithla peih lo tiin emaw lo sawisel thiang loa ngaihna kan nei zel lehnghal. A chang phei chuan Sakhaw rawngbawltu zahawm takte pawhin kawng tluana Hla maksak tak tak a ngaihthlak tluan chang pawh a awm lo ang tih sawi har tak a ni. Sawi tawh angin Youtube chuan awlsamna khawvelah min hruai lut a, hla leh thu lamah phei chuan a telloin kan awm thei lo ta hial a nih tak ber hi.
KAN BENGVARNA HNAR A NI
Zai ngaihthlak leh thawnthu ngaihthlakna chauh ni loin kan Youtuber-te chuan thu tharlam tak tak ngaihthlak theih turin an chhawp reng a, a bik takin Chanchinthar ngaihthlak tur a awm reng leh thil thleng thar chanchin ngaihthlak tur a awm reng thei hi thil lawmawm tak a niin kan bengvarna hnar tak a lo ni ta. Khawilai hmunah emaw Lirthei chesual sela rei lo teah Youtube lamah a chetsual dan chanchin kimchang taka kan han ngaithla nghal thei mai te, Pu Vanate’n Rulngan leh Saphai chanchin heti taka min han hlui thei ta mai te leh Ngopa lama Dawnfawh an thar tam dante mai baka Tualte khuain Tomato an thar chhuah dan chanchinte ngei pawh mahni awmhmun atangin duh hun huna hmehchhuah theih tura a han awm bawkte hi hmasawnna ropui tak a ni. Ghost Hunter kan tih leh Mukbang kan tih zawng zawngte pawh hi Youtube vanga kan hriat leh kan hmuhte vek an ni a, sawi kim sen a ni lo zawk ang.
Aizawl khawpuiah thil tih ropui deuh emaw thil danglam deuh awmin thil thleng thar awm sela Chennai leh Farkawn atang pawhin minute rei lo teah Youtube hmangin mi tu pawhin kan lo hmu nghal thei vek mai te hi hmasawnna ropui tak a ni. A bik takin kan Politician-te thu leh hla phei chu ngaihthlak sen loh tih hial tur hi kan thalaite’n Youtube Channel-ah an dah tawh a, kan zaithiamte zai phei chuan thlir a hlawh viau thin a ni. Tunah zet chuan Youtube chu a thalai thil em mai tih ngawt a theih tawh loh a, engkim a awm tawh avang hian tu pawhin kan mamawh leh kan thlir chak zawng tur hi kan dah ta teuh mai a, kan fate ngaihthlak leh thlir tur hi thliar a ngai ta hial zawk a ni. Kan sakhaw rawngbawltute leh Damdawi lam thiamte zingah ngei pawh Youtube hi tangkai taka hmang kan lo awm ta zel a; Rilru lam natna kan tih, Depression, Anxiety leh Panic Attack neite tana damna tur leh an mamawh tur thusawi Youtube lama a han awmte hi a lawmawm ngawt mai.
ENG NGE YOUTUBE CHANNEL KAN NEIH CHHAN
ChatGPT-a ‘What are I can receive a money from Youtube Channel? Tia ka zawhna chu heti hian mi chhang a; 1. Your channel must have at least 1,000 subscribers. 2. Your channel must have at least 4,000 watch hours in the last 12 months. 3. Your channel must comply with Youtube’s community guidelines and terms of service tiin. Heng bakah hian thil pawimawh eng eng emaw chu a la rawn sawi tho nain heti chinah pawh hian Youtube atanga sum hmuh theih dan tur chu kan hrethiam thoin a rinawm. Hetianga Youtube channel siam atanga sum leh pai hmuh theih a nih avang hian mi thenkhatte chuan sum leh pai hmuhna hnar tha takah an lo hmang mek ni pawhin a hriat.
Youtube channel siam avanga sum leh pai hmuh theih tih hriat avang hian phur vanga siam ve ngawt chi erawh a ni hauh lo a, dan leh dun fel tak a awmin a tlem berah mi sangkhat talin an subscribe a ngaih bawk avangte hian ngaihtuahna fumfe tak neih hmasak a ngai ngei ang. Chu lam chu engpawh nisela midang tana rawngbawlna kawng pawimawh tak a ni tih hi kan hriat reng a ngai a, mipuia innghat a ni tih hi kan hriat a ngai a ni. Thu dik tawk lo tarlan a tha lo ni mai loin midang ti thinur thei tura fuihpawrhna lam hawi phei chu a tih chi hauh loh a, chhiatna leh vanduaina lam thil pawh ni sela tawngkam ngaihthlak nuam tak kan hman hram hram a tha bawk a ni. A pawimawh berah chuan mi zawng zawng thlir leh ngaihthlak theih thil a nih avang hian ngaihthlak hrehawm thei tur chu dah loin leh Mizo tawng dik tak hman tum hram hram zel chunga fimkhur leh uluk takin thu leh hla i chhawpchhuak thin ang u.
YOUTUBE LEH KEINI
