Youtuber leh facebooker lakah thubuai
Mizoram State Commission for Protection of Child Rights (MSCPCR) chuan danin a humhalhna pela naupang kumtling lo nihna tilangtu youtuber pali leh facebooker pahnih lakah Cyber Crime Police Station Aizawl-ah FIR a thehlut.
Tunhnai khan naupang kum tling lo, danin nena inrem loa che (dan bawhchhia) chu social media hrang hrangah naupang hming, thlalak, video leh address a nihna tilang theia pholan leh puanzar a ni a. Hei hi danin naupang a humhalhna kalh a nih avangin MSCPCR hian bawhzui nghalin, a pho chhuaktu youtubers leh facebookers lakah Cyber Crime P/S-ah FIR a thehlut.
MSCPCR chairperson Jimmy Laltlanmawia chuan social media – youtube, facebook, whatsapp leh digital media platform hrang hranga naupang, dan nena inrem loa chete hming, nihna, thlalak, video leh address tarlan a ni leh thin chu ngaimawhawm a tih thu a sawi a. Hei hi ‘The Juvenile Justice (Care & Protection of Children) Act 2015 Section 74’ chuan a khap tlat tih a sawi a ni.
“Hetianga naupangte hming, address, thlalak, video leh a dangte pholan a nih chuan nakin zela naupang than len huna khua leh tui tha an nih theihna tur kawng daltu leh midangin an chhinchhiah bik theihna tur thil pawi tak a nih avangin danin a khap tlat a ni,” a ti. He dan bawhchhetu chu thla 6 thleng lung in tantir leh cheng nuai 2 thleng chawitira hrem theih an ni tih sawiin, Commission chuan dan bawhchhetute chu hrem an nih theihnan hma a la zel dawn a, internet social media leh digital media hmang tute chu fimkhur turin a ngen tih a sawi a ni.
MSCPCR hotute sawi danin, hetianga naupang pholangtu hi anmahni pawhin koin an chungah hma an la thei tho naa, police nena hma lak ho hi an duh vangin FIR an thehlut ta zawk tih an sawi a ni.
Youtuber leh facebooker lakah thubuai
