Zahmawh rawngkaia dan bawhchhia a puh a nih vangin Taeil-a’n NCT chhuahsan
K-pop band NCT nghawr lawih thei thil thleng a awm a, an main vocalist Taeil, a hming tak Moon Tae-il kum 30, chu zahmawh rawngkaia dan bawhchhiatna neia puh a ni a, engtiang chiaha dan bawhchhia nge a nih tih puan a ni lo a, police ten an chhui mek a, ani pawhin hetiang boruakah hian an band a chhuahsan ve nghal bawk. Taeil band atanga a chhuah thu hi NCT agency SM Entertainment-in thuchhuah siamin an puang a ni. Seoul Bangbae Police Station chuan June thlaa hmeichhe pakhatin Taeil hi a lakah zahmawh rawngkaia pawi khawiha a puhna an dawn avangin Taeil hi chhui a nih thu an puang a ni.
SM Entertainment thuchhuahah chuan, “Taeil chu zahmawh rawngkaia dan bawhchhia a puh a ni a. He thil tleng hi kan thlir zui a, nghawng a neih theih dan leh a pawi dan te kan thlirho hnuah Taeil chu team (NCT) anga a chet zui ve rem loin kan hria a ni. Taeil pawh kan sawipui hnuah group a chhuahsan mai tha kan ti tlang ta a ni. Taeil pawhin a chhuitu police te takin a thawhpui a, chanchin kan inhriattir zel ang. Kan artist avanga rilru hrehawm zawng zawng te chungah thupha kan chawi takzet a ni,” an ti.
Taeil hi NCT member dangte pawhin Instagram-ah an unfollow nghal a, NCT leh NCT 127 social media profile te pawhin Taeil hi an unfollow nghal bawk. NCT member thin Taeyong, Doyoung leh Haechan te pawh an unfollow nghal a, NCT leader Taeyoung hi sipai tanglai a ni a, Taeil lanna group thlalak zawng zawng pawh a delete nghal vek bawk.
NCT-ah hian member 25 awmin, chu chu band tê zawk parukah an then darh leh a, chung zingah chuan NCT U leh NCT 127 te pawh a tel a, Taeil hi K-pop idol angin NCT-ah a debut a, a hnuah NCT 127-ah permanent member a ni zui ta a., NCT U-ah member a ni bawk. NCT 127-ah hian 2016 atanga telin, Billboard 200 (albums) chart-a lang thei album pariat an nei tawh a, chart top 10-a lang thei album pathum an nei tawh bawk. Tunah hian an line-up chu Taeyong, Yuta, Jaehyun, Mark, Haechan, Doyoung, Jungwoo leh Johnny te an ni. An hla Cherry Bomb, Kick It leh Sticker te pawh an larpui viau.
Taeil hian thawkkhat lai khan Guinness World Record a siam tawh a, Instagram-a follower maktaduai nei rang thei ber record a siam. November 2020 khan record hi a siam a, mahse, tunah chuan a record hi BTS member Kim Taehyung-a’n 2021 khan a rawn khum ve leh tawh a ni.
Zahmawh rawngkaia dan bawhchhia a puh a nih vangin Taeil-a’n NCT chhuahsan
