Zai tawh vanga bul tan lo tur Bellingham
A dar vei lam hliam an zai avangin Jude Bellingham chuan season tharah hian Real Madrid-a a team-mate ho rualin bul a tan ve thei dawn lo.
Bellingham hian Real Madrid Club World Cup game ruk kha khel kim vek thei mah se kum 2023 atanga a dar na tawh kha zai law law thain an hria a; heti a nih tak avang hian Real pre-season pumpui bakah season thar tan hunah a tir lam chawlhkar ruk tal chu a chawlh an ring.
England leh Madrid midfielder hi tunah kum 22 mi lek la niin, a vanglai a hman chhoh mek laiin zai a tawk ta hlauh a; mahse, zai a tawh hun hi season inbuatsaihna pawh an la tan hma a ni a, a ziaawm khawp dawnin a lang a; kumin September thla World Cup qualifiers-a Andorra leh Serbia hmachhawn tur England squad-ah pawh a tel hman ngei rin a ni.
A dar a tihnat tanna chu Rayo Vallecano nena an inkhelh tum kha niin, han inkhelhpui lawp lawp reng mah se chhungrilah a dam hlen tak tak thei chuang lo a, season chawlh laia zai law law chu duhthlanna fuh ber turah an ngai ta a ni.
Real Madrid thuchhuahin a tarlan danin, an midfielder chuan training a zawm hmain ngaiawh lehna programme (rehabilitation period) a paltlang phawt dawn a, August ni 19-a manager thar Xabi Alonso hoa La Liga season thar an tan hunah chuan chuan khelmual chhungah a hmel hmuh tur a awm lo phawt ang.
Spanish club tana a inkhelh theih lai June thla khan Bellingham hian reporter rualte hnenah dar cher behna (sling) nena inkhelh reng ngai chu a nin thu a lo sawichhuak tawh a; karliamta khan Real chuan United States leilunga khelh Club World Cup semi-final match pakhat zawka Paris St-Germain an hneh loh hnuah an midfielder chu inzaina pindana nawrhluh an titlu ta a ni.
Bellingham hi kum hnih kalta khan Real chuan Borussia Dortmund atangin pound maktaduai 115 tehrengin an lei a; Spain a thlen hnua a season khatnaah a club thar tan belhkhawmin game 43-ah goal 23 a thun sak nghal pang a, La Liga title leh Champions League trophy a lakpui nghal.
Season liamta kha chuan na nena inkhel a nih avangin game 58-ah goal 15 chiah a puitlin zo a; league title pawh Barcelona lakah an hloh a, Champions League quarter-final lamah ni se Arsenal hneh loin an tlawm a, club thuneitute tan pawh an midfielder goal khung thei chu na nei loa chhuah law law an duh ta niin a lang!
Zai tawh vanga bul \an lo tur Bellingham
