1976-a soft rock hla hit ‘Dream Weaver’ leh ‘Love is Alive’ avangin rimawi khawvela hming chher, hranghlui zaithiam Hary Wright, kum 80 chu Thawhtanni kalta khan Palos Verdes Estates-a a chenna inah Parkinson’s deaease leh Lewy body dementia avangin a thi.
Gary Wright-a fapa Justin chuan a pa natna hi kum sarih vel an inekawl tawh niin a sawi a, “A tir lamah chuan buaipui pawh a ngai tehchiam lo va, mahse, kum hnih khat hnuah chuan enkawltu a mamawh ta a, home-care nurse te mamawhin, darkar 24 chhung enkawl leh buaipui ngai a ni zui ta a ni,” a ti.
Wright hi April ni 26, 1943 khan Cresskill, New Jersey-ah a piang a, a naupan laiin lemchan lamah inhmingin, Captain Video leh His Video Rangers-ah te pawh a inlan a, chumi hnuah 1954 khan Broadway cast ‘Fanny’ a zawm leh a ni. Medical school a rap ve zuai a, 1960s-ah England-ah pemin, chutah chuan English musician pali te nen blues-rock band Spooky an din a, album pathum an tihchhuah hnuah band atanga chhuakin, solo album pahnih ‘Extraction’ (1970) leh ‘Footprint’ (1971) te a tlangzarh a, chumi hnuah Warner Bros. Records hnyaiah lutuin a solo album pathumna ‘Dream Weaver’ a tlangzarh ta a ni.
‘Dream Weaver’ hi 1975-a a tlangzarh niin, Billboard 200 (albums) chart-ah pawh No.7 a kai a, he album hi rimawi khawvela a hming chher tak takna a ni ta a ni. A album title track ‘Dream Weaver’ hi Billboard Hot 100 (singles) chart-ah No.2 a kai a, a hla dang ‘Love is Alive’ pawh chart No.2 a kai. ‘Dream Weaver’ hi a hlaah pawh hriathlawh ber a ni zui ta a, Hollywood movie soundtrack lamah pawh an hmang rim khawp mai ‘Wayne’s World’, ‘Toy Story 3,’ ‘Ice Age: Collision Course’ leh ‘The People vs. Larry Flint’-ah te pawh an hmang a, TV series hriathlawh tak Glee leh Superstore-ah te pawh an hmang.
Zaithiam Gary Wright a thi
