Lunglei Municipal Council (LMC) inthlan lo awm turah tunlaia Mizoram zaithiam lar Lalenkawli Pautu a ding dawn a, social media lamah titi a luah nghal.
“Thil tha duh vangin politics-ah ka lut,” a ti a, “Khawtlang tana theihtawp chhuah ka duh a, chumi tur chuan politics-a luh a ngai a,” a ti bawk.
Congress ticket-a ding tur a ni a, party dangah pawh seat chang thei a nih thu te sawiin, “Kei tehlul hi tu tu emawin min sawm ve a,” a ti.
Politics-a luh hi a thil tum a nih ngai loh thu a sawi a, “A tulnain min nawr a ni. Keini mai mai pawh min lo awt der ve a, min han sawm der a, ram leh khawtlang tana theihtawp chhuah turin kan lut ve ta a ni,” a ti a, “Pu Lalsawta hi pa tha a ni a, ka ring ngam a, ka lut a ni mai a,” tiin Congress party-a a luh chhan a sawi.
A ding dawn a ni mai lo a, campaign-in theihtawp a chhuah tawh. A’n tih ve takah chuan a dan a dang a ti a, “A chhunga han awm chuan a dan a dang khawp mai,” a ti.
“Han tih ve takah chuan theihtawp chhuah a ngai a, vah pawh ka vak kual ve nasa. Mi khawngaihna ka ngen a, han tih vak dan tur ka hre lo a, ‘Min lo khawngaih vote hram rawh u,’ tiin ka ngen thin,” a ti.
Hetia politics-a a luh hian zai lam a chawlhsan dawn tihna a nih loh thu a sawi a, a theih phawt chuan zai hi chhunzawm zel a tum thu a sawi.
“Min sawm duh te an awm a nih phawt chuan kan zai zel ang chu ka ti. Chawlhsan mai ka tum lo a, zaina tur kan neih chuan ka zai zel ang,” a ti a, tunah pawh programme awm sa a neih nual thu sawiin, “Ka inthlahrung zawk a, min lo sawm ve laklawh tawh si a, min iai leh si ang tih ka hlau a. Mahse kan han inbia a, ‘politician enin kan en hlei nem che,’ tiin min lo chhang a,” tiin, YMA programme, a zaina turah pawh YMA hruaitu lamin zai tura an tih thu a sawi.
MNF hla, Congress hla, ZPM hla a sak thin thu a sawi a, “Zai mite chu mistiri ang kan ni a, mistiri pawh a ruaitute duh dana thawk tur an ni a, keini pawh min sawmtute’n sa tura min duh an nei a, ka sa mai a,” tiin hemi chungchang hi a sawi.
Zaithiam lar Lalenkawli Pautu politics-ah ‘Thil tha duh vangin politics-ah ka lut’
![](https://theaizawlpost.org/wp-content/uploads/tap_logo-min-large.jpg)