International Day of Sign Languages pualin Gilead Special School (GSS), Bawngkawn Brigade Aizawlah Zirtawpni khan Spastic Society of Mizoram chuan programme a buatsaih a. Zaizira inbiakna puala ni bikah hian kumin thupuiah “Bengngawngten khawi hmunah pawh harsatna nei loa zaizira an duh zawng an sawi theihna khawvel” tih hman a ni.
He hun hi larsap Dr Hari Babu Kambhampati leh a nupui Dr Jayashree Kambhampati ten an hmanpui a. Mizoram hmun hrang hranga pianphunga rual banlote leh an nu leh pate zawng zawng duhsakna chibai a buk tih larsap hian sawiin, “Kut zaizira inbiakpawh theih hi thil pawimawh tak a ni a, beng tha lo leh tawng harsat te tan chauh niloin, hnam hrang hrangte tawng inhriatsak lem lo te pawhin inbiakna atana an hman theih leh inpumkhatna atan hmanraw tha tak a ni,” a ti.
Sawrkar hmalakna leh Spastic Society of Mizoram thawhrimna avangin hetiang zirna school danglam bik Mizoramah kum 30 chuang a lokal tawh chu ropui a tih thu a sawi a. Vocational Training Center leh Skill Development Wing kaltlangin zirlaite hnenah thiamthil an zirtir chu tha a tih thu a sawi. He school atanga zirchhuak zingah themthiamna lam – puanthui, carpentry leh eizawnna dangah mi hlawhtling tak tak an awm zel chu hlawhtlinna ropui tak a ni tih a sawi a ni.
Zaizira inbiakna pual ni bik hmang
