MNF-in Mizoram zalenna an puan kum 60 tlin, Diamond Jubilee chu Thawhtanni khan Zoram hmun hrang hrangah hman a ni. A hmanna pui ber Aizawla hmanpuitu MNF president Zoramthanga chuan, kum 1947-a India-in British ho atanga zalenna a hmuh khan Mizo zingah India ram awpna hnuaiah kan awm dawn tih hre lo an tam a, British hoin min liamsan daih a, inremna thu thlun leh ban phartir pawh awm loin India-ah kan awm ringawt mai tih a sawi.
Hei hi MNF dintu Pu Laldenga te khan India Prime minister Lal Bahadur Shastri hnenah sawiin, India chu ‘republic’ a ni a, India danpui siam lai, India siam a nih laiin Mizote kan tel ve loa, barhluih kan ni a, India-ah kan tel ve dawn a nih chuan Mizoram tana tha leh him tur duhzawng an sawi a ngai, tiin an thlen a, Prime minister hian chhan ngaihna a hre loa, mithiamte a lo rawn tur thu in a thlah tih a sawi.
Hun a kal zel a, 1966-ah Assam sawrkarin Mizoramah sipai a rawn tirlut ta a, Pu Laldenga ten buaina chhuah tir loh dan dapin Assm chief minister biak an tum a, a lo biak duh tak si loah chuan Mizoram zalenna puan a ni ta tih a sawi a ni.
“Kum 20 chhung kan inkah hnuin kohhran, NGO leh pawl hrang hrang ngenna angin inremna entawntlak ber kan nei ta a. Electoral roll-a la awm lo, thlantlin hlim chief minister nihna Pu Denga’n a lan theite kha a inremna ropui zia tilangtu a ni. Kha inremna kha thenkhatin sawi bawrhban tum thin mah se, a hlut zia kan hre zel a ni,” Zoramthanga hian a ti.
Pu Lalduhoma’n pawl hrang hrang dina kum 40 chuang a kalpui hnuah, kum 2023 inthlanah ZPM thlipui a tleh a, MLA 20 chuang neiin an sawrkar a. Mahse, mipuiin an hrechiang tulh tulh a, an mo thar laiin ruling lai an tlin ngei ngeina thin inthlan hrang hrangah an tla zel tih MNF president hian a sawi. ZPM sawrkarah mipui, kuthnathawktu leh sawrkar hnathawk an beidawng tawh nia sawiin, “A tuka lang leh mai tur an hotupa berin dawt a sawi zuah zuah a, a hoten an chulmam sak zel a, a hote chulmam sen loh hotupa berin dawt a sawi thin,” a ti.
MNF chu kawng lakah Pathianin a kalsan dawn loa, a hun a tihah Pathianin a chawisang leh zel thin tih a sawi bawk.
MNF hian zalenna puan kum 60 tlin pual hian an party office – Mizo Hnam Run-ah Diamond Jubilee lungphun an siam a ni.
Zalenna puan kum 60-na lawm Pathianin MNF a chawisang thin: – Zoramthanga
