Kar kalta Inrinni zana Durtlang Leitan bula doctor pahnih kut thlak rawn chungchang chu social media-ah a darh nasa hle a. Kut thlaktute zingah hian police pakhat pawh a tel ve niin thu a thang lehnghal.
Hei hi a dik a nih chuan, mipui humhim tura sawrkar rawih mek zinga pakhat chuan a humhim tur zawka a sawisa tihna a ni. Hetiang thil, movie vel chauha chan chawp tura ngaih, a tak taka Mizoram khawpui bera a thleng a nih ngat chuan, zan lam boruak hi a ngaihtuahawm dawn ta hle tihna a ni awm e.
Tunhma deuh khan khawlaiah zurui an inlek thin hle a, mi kawngkal lai lo tihbuai mai mai kha an ching a, zan lamah hmeichhia leh nunau an chhuak tha ngam lo a, insual rawn te kha an chin avangin mipa tan pawh zan reiah chuan a ralmuang chuang lo. Chhun lamah pawh zurui, tawngkam bawraw tak taka midang vau khur khur chingte an awm a, kawngsira let mai mai khawpa rui chhiate kha hmuh tur an awm zut a, khawtlang an tinuam lovin an ti ralti thin hle. Chutih laiin, zurui khin kha an duh lo a, ‘zurui khin te chu…’ tih tawngkam te pawh a awm hman a; a lehlamah, khawtlang nun tinuam lotu chu zuruite kha an ni lawi si a ni.
Tun hnuah hi chuan, tunhma anga ualau taka khawlaia zurui inlek em em thin ang kha chu an awm tawh lo niin a lang a, mahse ruihhlo dang hi a lo tam tak avangin, rukruk a hluar a, hriamhrei chelek te pawh a hluar chho leh tan a. Thawkkhat lai kha chuan ‘invit hlum’ tih thawm kha hriat tur a awm zut thin a nih kha.
Tunah pawh hian, ruihhlo tih chingte khawlaiah an inluling leh tan a ang ta viau a, kawngpui lun lai taka insual buai hmuh tur an awm leh ta hi, he lam kaihhnawiha mawhphurhna la tura ngaih kan Police-te leh VDP te pawh hian mipui himna tur an ngaihtuah vat a tul hle. Hun pui kan hnaih zel a, a khawtlang ang pawha hmalakna tur a awmin a rinawm.
Mi tlemte kawhmawh bawl chingten, a tam zawk mipuite thlabarna leh ralmuanlohna an thlentir thei zawk hlauh hi thil dik a ni lova, mi tlemte tihhreawmin mipuite hi kan awm tur a ni lo.
Zan lam boruak
