LPS Arena, Falkland Venga Tata SK 612 LPS Pro Fight chu a hmawr bawk a hnai zel a, zanin hian LPS Title Fight ruala professional inhnek dang thlir tur a awm dawn a, inhnek turte kan bihchiang zawi zawi ang.
Ticket Rs. 50 man bakah Rs. 500 man 52 siam tel a ni a; LPS Youtube channel-ah live-a pek chhuah a ni dawn a, mahse, en thei turin pawisa chawia member nih a ngai dawn.
MIDDLEWEIGHT – Round 4
C. Lalhruaitluanga (Chawngtlai)
v F. Lalthanliana Junior (Lunglei Electric Veng)
C Lalhruaitluanga : kum 25, kg 73.9, height – 5’8″, reach – 5’9″
Pro Record : 6 win (3 ko), 0 loss, 0 draw
Pro Fight weight hrang pahniha champion turin Hruaia’n rin a hlawh. Nikum khan welter-ah champion-in kuminah middle-ah a insawn a, vawihnih a khelh tawhah knockout ve vein a chak. Chawngtlai boxer hian professional boxing-ah hnuhma tha tak a nei mek a, Thanliana a hneh a nih chuan tlawm nei loin vawisarih a chak zawn dawn a ni.
F. Lalthanliana Junior : kum 23, kg 73.9, height – 5’9½”, reach – 5’8½” Pro Record : debut
Thanliana’n semi-final lamah fiahna pawimawh tak paltlangin Daniel Beipasasa a hneh a, inrintawkna sang zawk nen Title Fight-ah a inlan thei dawn. Kumin kum tir khan Mizoram Fight Night lightheavy-ah a champion a, Hruaia a hneh a nih chuan Pro Fight-a a tel hmasak berah a champion nghal dawn a, hnehna changin professional bul a tan tel nghal bawk ang.
SUPER BANTAMWEIGHT (WBC INDIA TITLE) – Round 8
Adil Rajesh Kumar Singh (Mumbai)
v F. Zoramchhana (Cherhlun)
Adil Rajesh : kum 24, kg 53.8, height – 5’5″, reach – 5’6″ Pro Record : 9 win (0 ko), 4 loss, 2 draw
Adil Rajesh hian professional boxing vawi 15 a khelhna tur niin, WBC India bantam ranking-ah pathumna a ni mek a; tun tumah hian a khelh thinna aia rit super bantam-ah title lak theihna hun tha neiin Mizoramah a lo kal a, Zotea aiin tawnhriat a ngah zawh a ni.
F. Zoramchhana : kum 24, kg 54.9, height – 5’6″, reach – 5’5½” Pro Record : 6 win (2 ko), 3 loss, 2 draw
WBC India super bantam ranking-ah Zotea’n palina a luah mek a, title chuha harsatna a tawh thin siamthat tumin a inlan dawn a ni. Pro Fight title fight-ah tum thum inlan tawhin a chak zo lo vek a, WBA Asia title chuhin Bangkok-ah hlawhtlinna a chang zo lo bawk a, tun tumah hian a tlawm leh a nih chuan title chuha vawinga a tlawm zawnna tur a ni.
BANTAMWEIGHT (WBC INDIA TILE)
– Round 8
Pradish A (Chennai) v Laldingliana (Tuipui)
Pradish A : kum 22, kg 53.3, height – 5’3″, reach – 5’6″
Pro Record : 2 win (1 ko), 0 loss, 1 draw
Professional huangah Pradish hian hnuhma a la nei tam lo viau a, vawithum a khelh tawhah tlawm nei loin tum hnih a chak a, WBC India super fly ranking-ah 11-na a luah. A khelh thinna aia weight rit zawkah title a chuh dawn a, a tan fiahna pawimawh tak a ni dawn.
Laldingliana : kum 24, kg 53.3, height – 5’5½”, reach – 5’7½” Pro Record : 3 win (2 ko), 0 loss, 0 draw
2019 Pro Fight bantam title a lak hnuah Dinga’n professional a luhchilh a, a zin kawng erawh a tluang tawk lo. Vawinga inhnek tawh mah se tum hnih chu result awm loa nuaibo a ni a, vawithum khel tawha chhinchhiah niin a chak vek a, mi pahnih a knockout. Tun hi professional huanga a inhnek tawha lian ber tur a ni a, champion kawnghren hreng ngei turin a inpuahchah nasa.
BANTAMWEIGHT – Round 4
Laldinsanga (Lunglei Ramthar)
v Ramdinthara (Pangzawl)
Laldinsanga : kum 20, kg 55.0, height – 5’5½”, reach – 5’6″ Pro Record : 5 win (4 ko), 0 loss, 0 draw
Dinsanga’n rin a hlawh hle na a, kuttum hlauh-awm Ramdina hmaah inlehthalna pumpelh turin kawng a awlsam bik lo tura ngaih a ni. Kum 2022 atangin Pro Fight-ah a tel a, a tir atanga vawiruk knockout hmanga a chak hnuah point hmangin semi-final-ah David Laldanmawia a hneh. Nikum Pro Fight semi-final atangin professional a luhchilh a, vawinga a chak zawn mek a ni.
Ramdinthara : Pangzawl, kum 20, kg 55.9, height – 5’2½”, reach – 5’3″ Pro Record : debut
Beisei aia ropuiin Ramdina a inlar a, nikum khan round of 16-ah tlain kuminah rahbi a tuk sang hle. Semi-final-ah Omega Lalramdina hnek tluin knockout zui lo mah se phu takin a chak a, professional luhchilha Title Fight hmachhawn turin a inpuahchah a, rapthlak taka che turin a intiam.