Pathianni liamta khan Spain rama an second division derby game boruak lum zetah Real Zaragoza goalkeeper Esteban Andrada chuan Huesca captain Jorge Pulido a hnek her lawp a, game 13 chhung inkhel thei lo tura hremna pek a ni ta!
Andrada hi Mexican club Monterrey atanga Spanish club-in loan-a an chhawr lai niin, hun pekbelhah yellow card vawi hnih hmuh avangin hnawhchhuah a ni a, red card hmanga hnawhchhuah a nih hnu hian Pulido lam a pan thut a, a bekah tak a ve lawk siah a, Argentine chunga hremna an lekkawh chu a na lo thei ta lo a ni.
An captain Jorge Pulido thlavang hauhin Huesca player-te an rawn pawr ve nghal a, khelmual chhungah insualbuaina a chhuak a, Huesca keeper Dani Jimenez leh Zaragoza player Dani Tasende-te pawh hnawhchhuah ve nghal an ni.
Spanish football federation (RFEF) chuan Andrada hi a khawsak dan avang khan match 12 atan an phuar a, game khat dang chu kha match-a red card a hmuhin a ken tel hmasa (automatic one-match ban) a ni thung.
RFEF report-a tarlan danin, “Andrada khan red card a hmuh hnuah lehlam pawl player chu tlan paha va panin, zuang chungin Pulido kha na tak leh dim lo takin a hnek a, na takin a ni a hnek ni.
“Kha thil thleng avang han hremna na ber (maximum sanction) 12-match suspension chu pek ngei ngei a phu a ni,” tiin.
He report vek hian Andrada leh a club vawn lai Zaragoza-te chu sum chawitir an nih tel tur thu a tarlang tel.
Kum 35 mi Argentine Andrada pawhin Pathianni vek khan a chet dan avanga thupha chawi nghalin, “Kha thil thleng avang khan pawi ka ti takzet a; ka thiltih kha kan club leh fans hlimthla diktak pholanna a ni lo a, kei ang professional tih chi leh nih dan tur pawh a ni hlawl lo a, pawi ka ti ngawih ngawih a ni.
“Ka career pumpuiah tunhma lamin red card vawi khat chiah ka la hmu am, chu pawh penalty area pawna handball vang lek a ni nghe nghe.
“Eizawnna thuhmun, buaipui inang kan nih avangin Jorge Pulido chungah pawh thupha ka chawi a; dik taka sawi chuan ka thiam loh hul hual a ni. Khatih lai khan game-ah ka rilru ka hloh chhiava a, tunah chuan league lamin ka thiltih nghawngh engpawh min pek dawngsawng turin ka inpeih a ni,” a ti.
Kha inkhelah khan sikhat faiin Huesca chak mah se Zaragoza nen relegation zone-ah an la tang zui zel a; an player chet dan avang khan Zaragoza pawhin Pathianni khan thuchhuah siam nghalin, na taka an dem thu leh thununna an lekkawh ngei tur thu an tarlang.
Zaragoza keeper hremna a nep lo!
