NEDP atanga sum hmuh, cheng vaibelchhe 7 hmanga sak Inrinni khan chief minister Zoramthanga chuan Zarkawt Community Hall a hawng.
Sawrkar hmasain a sakna tur sum ruahmana bul a lo tan tawh community hall changtlung tak siam a ni chu lawmawm a tih thu chief minister hian a sawi a. A hmunhma an hman tangkai dan lawmawm tiin, hrilengin hnathawh tikhaihlak deuh mah se, tha taka chhuah a ni chu a lawmpui tih a sawi.
“Mizote kan vanneihna chu, ‘community’ anga inhlawmfel taka kan awm hi a ni a. Hetia mipui kan inphuarkhawm that hian kan ram leh hnam min tichak a. Chumi tur chuan kan inhmuh tam a, inkhawm tam a pawimawh. Community hall kan hman tangkai dante hi kan hnam ziarang pawimawh tak lanchhuahna a ni,” a ti
Zarkawt Community Hall sa tur hian Suvidha Infrastructure, Upper Khatla chu contractor-a thlan a ni a. 2018 October 4 khan kut thlak tanin, kumin January 31 khan zawh a ni. Chhawng 5-a sak niin, basement 3-ah chowkidar quarter, basement 2-ah Multipurpose Hall, basement-1 leh ground floor-ah lirthei dahna, first floor-ah Multipurpose Hall, second floor-ah court hnih awmna badminton hall siam a ni.
Chief minister hian Inrinni vek khan Zarkawt field-a hnathawh mek a enfiah nghal a ni.
Zarkawt Community Hall hawng
