Zau 12-ah sazu puang hrai
Serchhip Joint Village Council leh District Agriculture Office Serchhip rel angin kumin Thingtam vanga sazu puangin buh leh thlai an seh chhiat lohnan Serchhip Mat Phai zau hrang hrang sazu puang hrai beihpui thlak a ni.
Serchhip Joint Village Council leh DAO tangdun hian Zawlpui, Chawm, Chamdur, Thliarpui, Lumtui, Tuichar, Zuangleng, Zehtet,Thuhruk, Lungbu, Luitedam, Tuisen, Lathei ah Serchhip FMC nen an hnatlang a.
DAO Lalchharliana’n Thingtam vanga sazu puang tur laka inven a pawimawhna, sazu kan hrai pawha fumkhur a ngaih zia a sawi a. VC leh loneitute nen thawhhona a that vangin an hlawhtling ngei a ring tih a sawi.
Sazu hrai hlum takte hi senghawi leh vek a ni a. Sazu thi hmuh phak chin chu phum vek an ni. Sazu sa ei thinte fimkhur tur leh sazu mana zuar thinte pawh fimkhur turin an inchah.
Sazu tur hman dan leh hrai dan, sawngbawl dan loneitute zirtir an ni a. Sazu tur a hmunah siam nghalin, loneituten a ruala an hrai theihnan sazu tur siamsa sem a ni.
Zau 12-ah sazu puang hrai
