Zau leh tha zawka kawngpui
siamthat tum dan inhrilhfiah
Urban Development & Poverty Alleviation minister K Sapdanga hoin Nilaini khan Aizawl Sustainable Urban Transport Project (ASUTP) hnuaia hmalakna leh, Temple Square leh Vaivakawn inkar kawng thawmthatna tura ruahmanna chu sawihoin inhrilhfiah a ni.
Aizawl West-II bialtu MLA, minister Lalnghinglova Hmar chuan telpuiin, UD&PA secretary Lalmalsawma Pachuau-in a kaihruai a. UD&PA leh PWD hotute bakah Tuikual, Dinthar, Dawrpui Vengthar leh Vaivakawn khawtlang hruaitute an tel.
UD&PA minister chuan ASUTP tum ber chu, Aizawl khawpui a lo nawm zawk theihnan leh traffic zam nasa thin a ziaawm zawk theihnana kawng tih zauh belh, him taka mipui an chetvel theihnana kalna nuam, footpath tha leh changkang zawk siam a ni tih a sawi.
Tun dinhmunah ASUTP hnuaiah hian Temple Square leh Vaivakawn inkar kawng bakah Bawngkawn leh Kulikawn inkar kawng thawmthatna tura ruahman niin, a hlawhtlin thuai theihnan khawtlang hruaitute chu theihtawp lo chhuah ve a, kawngpui tihnawk zawnga lirthei dah thinte vil uluk lehzual turin a ngen tih a sawi a ni.
ASUTP buaipui tura sawrkarin a rawih Mott Macdonald Consultancy atangin team leader Manish Rege leh programme coordinator HVL Zarzoenga ten powerpoint hmangin Temple Square leh Vaivakawn inkar kawng (km.1.87) tih hmasawnna tura ruahmanna an sawifiah a. Dawrpui Vengthar kawng pengthuam tih zauh, Temple Square leh Vaivkawn inkar kea kalna kawng thawmthat, step 22 awmte thawmthat, parking zone leh City Bus dinna changtlung zawka siam leh retaining wall thawmthat ngai thawmthat a ni.
Khawtlang hruaitute duhdan leh ngaihdan ngaihthlak niin, ruahmanna (DPR) siamnaa an telve theihnan kawng hawnsak an ni. Vaivakawn (chuanhnuai) leh Hunthar Veng inkar kawng, Fire & Emergency Services directorate bula chhuak chu mipui tam zawkin tangkai zawka an hman theihnan thawmthat theih dan tur a hmunah en nghal a ni.
Zau leh tha zawka kawngpui siamthat tum dan inhrilhfiah
