Zawlbuka e tang theuh theuh

Political party-te’n MPF nen thuthlung an ziak a,
mahse an thuthlung hi an bawhchhe vek ang, insawisel tur an awm lo ang.
Vote thlak ni thlenga an campaign danah political party-te’n MPF nena thuthlung an ziah an bawhchhe theu; vote thlak tur an phur haw theuh a, hei hi ualau taka an bawhchhiat pakhat a ni.
MPF leh political party-te thuthlungah “Vote thlak tura hmun dang atanga anmahni khaw lama kalna leh hawna tur ngaihtuahsak leh inthlan nia vote thlak tura motor-a inhruaitute hi election danin a phal loh avangin tu mahin ngaihtuahsak loh ni se,” tiin an ziak a, mahse political party-te’n voter hruai haw, phurh haw hi an ti vek.
A bikin khaw dang atanga Aizawla awmte vote thlak tura hruai haw hi inthlan apianga party leh candidate-te tih thin a ni a, tun tum inthlan pawh tum dang ang bawk a ni.
Political party-te hi inhek tur an awm chuang lo a, an ngawi tlang ta mai mai nia ngaih a ni a, chu chu campaigner-te sawi dan pawh a ni.
Langchang taka an bawhchhiat dang leh chu ‘house to house’ campaign a ni a, hei pawh hi an inen liam viau niah ngaih a ni.
Inthlan puan hnuah house to house campaign hi tih loh tur tiin thuthlung an ziak a, mahse inthlan hma zan thlengin mi ina leng kual an awm.
Kawngzawh pawh tih loh tur a ni a, tih loh phahna chin a awm na a, hetah pawh hian inhek thei tur an awm lo. Motor-a kawngzawh phei chu langsar takin an ti vek tiin a sawi theih ang.
MPF hruaitute pawhin kawngzawh an awm thu leh report an dawn thin thu te, a theih ang anga an bawhzui thu te an sawi a, house to house campaign chungchangah pawh report dawn a awm thin thu leh local forum lamin mipui hriat tura an puan thin thu te an sawi.