March ni 5 hi “Zoram Ni” tih a ni a, 1966 March ni 5 kha Indian Airforce te’n bomb leh jet fighter hmanga Aizawl khawpui an beih ni a nih vang a ni; ‘Zawlkhawpui senmei chan ni’ tia sawi thin a ni bawk.
1966 March ni 1-ah MNF-in zalenna an puang a, March ni 5-ah India sorkarin jet fighter leh bomb hmangin Aizawl a bei nghal, a tukah an chhunzawm bawk. He thil thleng hi vawiin thlengin mite mak tih a ni a, India sorkar pawhin a hriat that duh loh thilah ngaih a ni.
Chutih lai chuan Mizoram hi Lushai Hills tih a la ni a, Assam hnuaiah a awm. Assam Assembly House-ah Khasi MLA pahnih Stanley DD Nichols Roy leh Hoover Hynniewta te’n Aizawl beih chungchang hi an aupui a, anni hi Aizawla kala a hmuna thil enfiah an ni.
India sorkarin Aizawl an bomb lo niin an sawi a, Khasi MLA pahnihte hian chu chu an hnial. “Sir, sorkar hian ‘kan bomb lo e’ tiin tan a khawh a. Sir, an bomb ngei a ni tih finfiahna tur he House hi kan hmuhtir theih bakah bomb a puak lai ngei pawh kan hmu hlauh e. Sir, bomb pakhat, puak ta lo pawh a thla kan la a ni,” tiin Hoover chuan Assam Assembly-ah hian sorkar thu a hnial.
Jet fighter hmanga Zoram beih a nih laia India ram hruaitute’n he thil hi an pha a, prime minister Indira Gandhi pawhin Mizoramah bomb ni lovin ‘ration’ an thlak niin a sawi. Khasi MP Prof Swell chuan Parliament-ah India-in Aizawl beihnana nana an hman ralthuam keh them lekchhuakin, “Hei hi maw in ration thlak chu, chhum hmin a va’n har awm ve?” tiin prime minister a chhuahchhal a ni.
Thlawhna hmanga Aizawl beih a nih laiin mipui an tlanchhe nasa hle a, Zosap missionary Pu Robert-a hovi tlangval tlawmngaite’n ruang te an senghawi a, hun ralti tak hnuaiah Aizawl hi an thianfai a ni.
Zawlkhawpui senmei chan ni
