Daily Newspaper

ZAWLNEI DER ÂIAH ZAWLNEI SUAK

13

-PC Thangzikpuia

Mizo tawnga ‘der’ thumal hi thil tih (thiltih—ni suh e!) sawi fiahtu ‘adverb’ thumal liau liau a ni a; amaherawhchu, kan mi hmasa zâi kungpuite kha an lo themthiam na lailêng a, he adverb thumal hi hla thu atân an lo chei bâwl ‘verb’ thiam tlat mai a, “Pui-ni chu lêm ang der ta la…” ti tein sawisèl inthlahrunawm khawpa dak nalhin ‘der’ hi verb atân an lo leklam thiam a ni.

Chu mai a ni lo, verb dik tak ruangâm ang chiaha chûl hnûmin, verb thumala bet thin exclusion marker (suffix) behtirin, “Lêm ang min dersan lul suh,” tiin ‘dersan’ te an ti a; suffix ‘na’ behtirin verbal noun-ah te an siam a, “Derna ànkâ maw min lo hlan!” tiin ‘derna’ te an ti thin bawk. Hetiang hian hla thu lamah chuan ‘der’ hi verb nihtirin, verb-in a chhawm theih ang chi thu hnung bet (suffix) te pawh mâm zaihin an lo chhawmtir thiam thin a. Amaherawhchu le, hla (poetry) leh thu tluang (prose) hi chu thãl romei leh chhûm lei vâk khaikhin tum ang deuh a nih châng hi a awm fo a; an chêttlatna hmun a inan loh ang bawk hian an hmai tlâng pawh a inang lo fo thin.

Hla thu lamah chuan ‘der’ hi mâm nalh zaihin verb atân chelek theih ni mah sela, tawngkam pangngaiah chuan, “Lalhminga’n a nu a der,” tiin verb-ah han hmang thla ve zen ta mai ila chu, Mizo tawng hmangaihtute chuan ngho chhuahin mi an then khum the the duh mai ang. Ni e, hetianga tawngkam pangngaia verb atâna ‘der’ han hman luih te hi zawng, Pu Ruatvela mang chhe mang tawng vai thâwm ang chauh a ni mai dâwn a ni. Hla hi chu hla nge nge a ni a, mi themthiam bikte’n hla thu atâna kan thumal eng eng emaw mâm nalh zaiha an han chelek hian, chu chu hlaah chuan a lo mâwi thei mai thin a lo ni.

Tichuan, hla thu atân ‘der’ hi verb anga chei bàwl thin ni mah sela, tawngkam pangngai (prose) lamah chuan verb atâna chelek chi ziazâng a ni ve lo a. tawngkam pangngaia verb atâna chelek theih loh chu ‘participle’ emaw, ‘verbal adjective’ emaw pawh a ni thei lo tihna a ni ta bawk a. Hei hi hre fuh lovin kan Pathian lehkhabu lamah chuan adjective fir (pure adjective) ang maiin an lo chelek chawrh chawrh mai a; noun thumal qualify-tirin ‘zawlnei der’ te an lo ti palh ta rim rem mai a ni àwm e! Hei hi kan lo hriat than tawh dân leh kan benga a rîk than dan a lo nih ngheh tawh si avangin, mi tam tak phei chuan Mizo tawng dik lo buru lutuk a nihzia pawh hi kan hmu thiam pha tawh lo hial zâwk a; J.F.Laldailova (F) pawh khân ngaimawhin he kan ‘zawlnei der’ hi a lo tàwng ve tawh thin nghe nghe a nih kha.

He adverb thumal ‘der’ hi noun thumal qualify-tir lo hian, ‘zawl nei der’ tih emaw tal te hi chu ni sela, heta ‘nei’ hi verbal noun niin, ‘zàwl’ hi complement a ni ang a, ‘der’ hi modifier niin, Mizo tawng kal phungah (kalphung—ni lovin!) ‘der’ tum hmun pawh hi tlêm chuan a lo rualrem thei deuh zâwk ang a. Tichuan, ‘nupui nei der’ tih ang deuh hian ‘zàwl nei der’ tih hi noun phrase anga pawm luih theih te pawh a ni ve mahna! Nimahsela, tuna adjective ngialngan emaw ti-a ‘zawlnei der’ tia noun qualify-tu atâna an han hman dan teh ngâwk angah te hi chuan, ‘Pastor der, puithiam der, daktawr der, mipa der, naupang der…adt.’ tih ang chi hi kan inpui-chhuah chhangchhe duah mai dawn a ni!

Heti hi a nih avangin, ‘der’ thumal hi a themthiam fâlte’n hla thu lamah verb anga an lo chei bâwl thiam tih lohah hi chuan, tawngkam pangngaiah hi chuan adverb atân liau liau chauha chelek mi a ni a. “A muhil der,” tiin, “A na der,” tiin leh, ‘A tang der,” ti tein verb thumal sawi fiahtu ‘adverb’ atâna hman chi chauh hi a ni a; noun emaw, pronoun emaw sawi fiahtu ‘adjective’ hau anga chelek chi hi a ni ngai lo a ni. Tichuan, hetianga thil tih sawi fiahtu (adverb) a nih hian, a kawppui verb thumal nen hian ‘muhil der, na der, tang der’ tih ang chi hi mi sawina ‘noun phrase’ atân hman theih a ni ta thin thung a ni.

Hetianga verb thumal nen ‘noun phrase’ atâna kan hmannaa ‘modifier’ a nihna tih lovah hi chuan adverb thumal ‘der’ hi noun emaw, pronoun emaw qualify-tu ‘adjective’ anga hman luih chi hi a ni lo a, ‘Pastor der, puithiam der, Mizo der, Sâp der, zawlnei der…adt.’ ti tea noun thumal qualify-tu atâna hman luih tum hi chu, changêla sàwi bel tum ang deuh hi a ni a. Chuvangin, Bible lama ‘zawlnei der’ tia an lo dah palh, a dik lohzia pawh hmu fiah thei tawh lo khawpa kan lo than hnan tawh hi Mizo tawng dik zâwka thlâk thleng leh nân khua kan la tlai lo bawk a, kan Bible en nawn (ennawn—ni lovin!) lehtute pawh hian Mizo tawnga a tak ni lo, a tak ang ve tak sawina adjective thumal kan neih ‘suak’ tih emaw, ‘lem’ tih emaw hi noun thumal qualify-tu atân hian hmangin, ‘zawlnei suak’ tiin emaw, ‘zawlnei lem’ ti emaw tala an rawn dah dik ngam hi a hun tawh a ni.

Tichuan, he kan thu tlâng kawm nân hi chuan mi hrâng kal ta J.F.Laldailova thu khawchâng hi i han phawrh thar lawk mai teh ang u:

“Adverb chuan verb a ‘modify’ thin. ‘Muhil der, ti der, zawkneia chang/tang der’ te kan ti thei ang a; adjective anga hmangin ‘J.F.Laldailova der, Pu Lalmawia der, ramhnuai mi der, zawlnei der, Krista der, zirtirtu der, ui der, vawk der’ kan ti tur a ni lo…Pawisa lem (pawisa suak) te pawh hi mi bum nâna sìam leh chher an ni deuh zel nachungin, ‘pawisa der’ kan ti ngai hlei nem. Kan Zosapte’na kan tawnga thumal ‘parse’ chhin eih tum lo va, hnam kaihhruaina hmanraw pawimawh tak mai Bible-a min lo hmansak phiar phiar mai kha a tlai luat hmâa kan sût leh vek a tûl…Tute emaw dàwi mut rei lutuk tawh kan mi hluite hi chuan hetiang hi sût âia sût loh an duh deuh vek zâwk ang a; mahse, grammar kal hmang hre thalh tura kan ngaih, kan college sum hmun rap chin tawh thangtharho hi chuan vawi khat sawiah kan tawng hman dik lohna hi chu an rawn man chhuak zung zung mai dâwn a; keini chuan beisei pha tawh lo mah ila, anni chhuan nihlawh hi chu tawng dik lênna Zoramah an la chêng tho tho dâwn a ni.”

(- J.F.Laldailova, Bible Thlirna, pp. 73—74)

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy